ദുബായ്: ഷാര്‍ജയില്‍ മലയാളി യുവതിയേയും കുഞ്ഞിനെയും തൂങ്ങി മരിച്ച നിലയില്‍ കണ്ടെത്തിയ സംഭവത്തിനു പിന്നില്‍ കുടുംബ വഴക്കാണെന്ന് നിഗമനം. കൊല്ലം കൊട്ടാരക്കര സ്വദേശി വിപഞ്ചിക (20), മകള്‍ വൈഭവി (ഒന്നര വയസ്സ്) എന്നിവരാണ് മരിച്ചത്. ഒന്നരവയസുകാരി മകളെ തൂക്കികൊന്ന ശേഷം അമ്മ ജീവനൊടുക്കുകയായിരുന്നുവെന്ന് സംശയിക്കുന്നു. ഷാര്‍ജ അന്നഹ്ദയിലെ ഫ്‌ലാറ്റില്‍ കഴിഞ്ഞ ദിവസമാണ് സംഭവം.

ഭര്‍ത്താവ് നിധീഷുമായി അകല്‍ച്ചയിലായിരുന്നു വിപഞ്ചിക. സ്ത്രീധനത്തിന്റെ പേരില്‍ നിതീഷ് വിപഞ്ചികയെ നിരന്തരം മാനസികമായി പീഡിപ്പിച്ചിരുന്നതായും വിവാഹമോചനത്തിന് സമ്മര്‍ദം ചെലുത്തിയിരുന്നതായും വിപഞ്ചികയുടെ ബന്ധുക്കള്‍ ആരോപിക്കുന്നു. തന്റെ പ്രയാസങ്ങള്‍ വിവരിച്ചുകൊണ്ടുള്ള വിപഞ്ചികയുടെ ഒരു ശബ്ദസന്ദേശവും പുറത്തുവന്നിട്ടുണ്ട്.

തനിക്ക് നിതീഷ് അയച്ച വിവാഹമോചന നോട്ടീസ് ലഭിച്ചെന്നും വലിയ വിഷമത്തിലാണെന്നും പറഞ്ഞ് വിപഞ്ചിക സംഭവ ദിവസം രാവിലെ നാട്ടിലേയ്ക്ക് വിളിച്ച് അമ്മ ഷൈലജയോട് പറഞ്ഞിരുന്നു. അവര്‍ വിപഞ്ചികയെ സമാധാനിപ്പിച്ച ശേഷം കുടുംബസുഹൃത്തായ കൊല്ലത്തെ അഭിഭാഷകനെ വിളിച്ച് കാര്യം പറയുകയും മകളെ വിളിച്ച് സമാധാനിപ്പിക്കാനും ആവശ്യപ്പെട്ടു. ഇതേ തുടര്‍ന്ന് അഭിഭാഷകന്‍ വിപഞ്ചികയെ ഫോണ്‍ വിളിച്ച് വിഷമിക്കേണ്ടെന്നും പോംവഴിയുണ്ടെന്നും അറിയിച്ച ശേഷം കൂടുതല്‍ കാര്യങ്ങള്‍ രാത്രി സംസാരിക്കാമെന്ന് പറഞ്ഞിരുന്നു. എന്നാല്‍, രാത്രി വിശദമായി സംസാരിക്കുന്നതിന് മുന്‍പേ വിപഞ്ചിക ആത്മഹത്യ ചെയ്യുകയായിരുന്നു.

വിവരം ലഭിച്ചയുടന്‍ പോലീസ് സ്ഥലത്തെത്തുകയും തുടര്‍നടപടികള്‍ സ്വീകരിക്കുകയും ചെയ്തു. മൃതദേഹങ്ങള്‍ പോസ്റ്റ്മോര്‍ട്ടത്തിനായി ഫോറന്‍സിക് ലബോറട്ടറിയിലേക്ക് മാറ്റി. അല്‍ ബുഹൈറ പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.

മൃതദേഹങ്ങള്‍ നാട്ടിലേക്ക് കൊണ്ടുപോകണമെന്നാണ് വിപഞ്ചികയുടെ ബന്ധുക്കള്‍ ആവശ്യപ്പെടുന്നത്. എന്നാല്‍, മകളുടെ മൃതദേഹം ഇവിടെ ഷാര്‍ജയില്‍ തന്നെ സംസ്‌കരിക്കണമെന്നാണ് ഭര്‍ത്താവ് നിതീഷ് ആവശ്യപ്പെടുന്നത്. ഇക്കാര്യത്തില്‍ ഒരു ഒത്തുതീര്‍പ്പുണ്ടായ ശേഷമേ മൃതദേഹങ്ങളുടെ കാര്യത്തില്‍ തീരുമാനമുണ്ടാകൂ.