റിയാദ്: സൗദിയില് സ്കൂള് തലം മുതലുള്ള പാഠ്യപദ്ധതിയില് ആര്ട്ടിഫിഷ്യല് ഇന്റലിജന്സിനെ ഉള്പ്പെടുത്താന് തീരുമാനം. വിദ്യാര്ഥികള്ക്കിടയില് മൂല്യങ്ങള് വളര്ത്തുന്നതോടൊപ്പം ആര്ട്ടിഫിഷ്യല് ഇന്റലിജന്സ് മേഖലയില് രാജ്യത്തിന്റെ ആഗോള മത്സരക്ഷമതയും നേതൃത്വവും വര്ദ്ധിപ്പിക്കുകയാണ് ലക്ഷ്യം. ഈ അധ്യയന വര്ഷം മുതല് പദ്ധതി നടപ്പാക്കാനാണ് തീരുമാനം.
വിദ്യാഭ്യാസ മന്ത്രാലയം, നാഷണല് കരിക്കുലം സെന്റര്, കമ്മ്യൂണിക്കേഷന് ആന്റ് ഇന്ഫര്മേഷന് മന്ത്രാലയം, സൗദി ഡാറ്റ ആന്റ് ആര്ട്ടിഫിഷ്യല് ഇന്റലിജന്സ് അതോറിറ്റി എന്നിവയുമായി സഹകരിച്ചാണ് പദ്ധതി നടപ്പാക്കുക. മനുഷ്യ വിഭവശേഷി വികസന പരിപാടിയുടെ മുഖ്യ ലക്ഷ്യങ്ങളിലൊന്ന് കൂടിയാണിത്.
ഡിജിറ്റല് യുഗവുമായി ഇടപഴകാന് പുതുതലമുറയെ പ്രാപ്തരാക്കുന്നതോടൊപ്പം ഗുണപരമായ കഴിവുകള് നേടുന്നതിന് പൊതുവിദ്യാഭ്യാസം, സര്വകലാശാല വിദ്യാഭ്യാസം ഉപയുക്തമാക്കി സാങ്കേതിക, തൊഴില് പരിശീലനത്തില് പ്രാപ്തരാക്കുകയാണ് പദ്ധതികൊണ്ട് ഉദ്ദേശിക്കുന്നത്. പുരുഷ-വനിത വിദ്യാര്ത്ഥികളെ ഒരുപോലെ ശാക്തീകരിക്കുകയും ലക്ഷ്യമാണ്. പദ്ധതിയുടെ ആദ്യഘട്ടം എന്ന നിലയില് ആര്ട്ടിഫിഷ്യല് ഇന്റലിജന്സിന് ഒരു ആമുഖം എന്ന തലക്കെട്ടില് സെകന്ഡറി ക്ലാസുകളില് ഈ വര്ഷം മുതല് പഠനാരംഭം കുറിച്ചിട്ടുണ്ട്.
Related News
