കോഴിക്കോട്: സമസ്ത കേരള ജംഇയ്യതുല് ഉലമ ജനറല് സെക്രട്ടറി കാന്തപുരം എ.പി. അബൂബക്കര് മുസ്ലിയാര് യമനില് വധശിക്ഷക്ക് വിധിക്കപ്പെട്ട മലയാളി നഴ്സ് നിമിഷപ്രിയയുടെ മോചനത്തിന് ഇടപെടല് നടത്തി. യമനിലെ മതപുരോഹിതനുമായി ബന്ധപ്പെട്ട് നിമിഷപ്രിയ മോചന സഹായ സമിതിക്ക് ചര്ച്ച നടത്താന് അവസരമൊരുക്കിയാണ് കാന്തപുരം ഇടപെടല് നടത്തിയത്. യമനിലെ സുന്നി പണ്ഡിതന് സഈദ് ഉമര് ഹഫീസ് വഴിയാണ് തലാലിന്റെ കുടുംബാംഗങ്ങളുമായി ചര്ച്ച തുടരാന് നിമിഷപ്രിയ മോചന സഹായ സമിതിക്ക് അവസരമൊരുക്കിയത്. കൊല്ലപ്പെട്ട യമന് പൗരന് തലാല് അബ്ദു മെഹ്ദിയുടെ സഹോദരനുമായി കാന്തപുരം സംസാരിച്ചു.
അതേസമയം, ജൂലൈ 16ന് യമനില് വധശിക്ഷക്ക് വിധിക്കപ്പെട്ട നിമിഷപ്രിയയെ (38) മോചിപ്പിക്കാന് നയതന്ത്ര മാര്ഗങ്ങള് ഉപയോഗിക്കാന് കേന്ദ്രത്തിന് നിര്ദേശം നല്കണമെന്ന് ആവശ്യപ്പെട്ടുള്ള ഹരജി സുപ്രീം കോടതി ഇന്ന് പരിഗണിക്കും. ജസ്റ്റിസുമാരായ വിക്രം നാഥും സന്ദീപ് മേത്തയും അടങ്ങുന്ന ബെഞ്ചാണ് ഹരജി പരിഗണിക്കുക.
നയതന്ത്ര മാര്ഗങ്ങള് എത്രയുംവേഗം പരിശോധിക്കണമെന്ന് അഭിഭാഷകന് സുഭാഷ് ചന്ദ്രന് ആവശ്യപ്പെട്ടതിനെ തുടര്ന്ന് ജൂലൈ 10ന് വിഷയം അടിയന്തരമായി സുപ്രീം കോടതി പരിഗണിക്കാന് തീരുമാനിച്ചിരുന്നു. ശരീഅത്ത് നിയമപ്രകാരം മരിച്ചയാളുടെ കുടുംബത്തിന് ദിയാധനം നല്കുന്ന കാര്യം പരിശോധിക്കാമെന്ന് അഭിഭാഷകന് വാദിച്ചിരുന്നു.
മുഖ്യമന്ത്രി പിണറായി വിജയന് നിമിഷപ്രിയയുടെ മോചനത്തിന് ആവശ്യമായ അടിയന്തര നടപടികള് സ്വീകരിക്കണമെന്ന് ആവശ്യപ്പെട്ട് പ്രധാനമന്ത്രി നരേന്ദ്ര മോഡിക്ക് വീണ്ടും കത്തെഴുതിയിരുന്നു.
Related News
