ഷാര്ജ: ഷാര്ജയിലെ ഫ്ലാറ്റില് തൂങ്ങിമരിച്ച നിലയില് കണ്ടെത്തിയ വിപഞ്ചികയുടെ (32) അമ്മ ഷൈലജ ഷാര്ജയിലെത്തി. വിപഞ്ചികയുടെ സഹോദരന് വിനോദും കാനഡയില്നിന്ന് ഇന്ന് ഷാര്ജയിലെത്തും. മകളുടെയും കൊച്ചുമകള് വൈഭവിയുടെയും (ഒന്നരവയസ്സ്) മൃതദേഹങ്ങള് നാട്ടിലേക്കു കൊണ്ടുപോകാനാണ് ബന്ധുവിനൊപ്പം ഷൈലജ ഇന്നു പുലര്ച്ചെ ഷാര്ജയിലെത്തിയത്. ഭര്തൃപീഡനമാണ് മകളെ കൊലപ്പെടുത്തിയ ശേഷം വിപഞ്ചികയുടെ ആത്മഹത്യക്കു കാരണമെന്ന് പറയുന്നു.
വിപഞ്ചികയുടെ ഭര്ത്താവ് നിതീഷിനെതിരെ ഷാര്ജ പൊലീസില് കുടുംബം പരാതി നല്കിയേക്കും്. ഇന്ത്യന് കോണ്സുലേറ്റ് അധികൃതരുമായി ഇക്കാര്യം സംസാരിക്കും. അതേസമയം, മരണത്തില് ദുരൂഹതയുണ്ടെന്നും ഭര്ത്താവിന്റെ ക്രൂരപീഡനത്തെ തുടര്ന്നാണു വിപഞ്ചിക ജീവനൊടുക്കിയതെന്നും കാട്ടി അമ്മ ഷൈലജ നല്കിയ പരാതിയില് കുണ്ടറ പൊലീസ് കേസ് എടുത്തിട്ടുണ്ട്. ഭര്ത്താവ് കോട്ടയം പനച്ചിക്കാട് പൂവന്തുരുത്ത് വലിയവീട്ടില് നിതീഷിനെ (34) ഒന്നാം പ്രതിയായും ഇയാളുടെ സഹോദരി നീതുവിനെ രണ്ടും പിതാവ് മോഹനനെ മൂന്നും പ്രതികളായും ചേര്ത്താണ് എഫ്ഐആര് തയാറാക്കിയിരിക്കുന്നത്. 3 പേരും ഇപ്പോള് ഷാര്ജയിലാണ്. ആത്മഹത്യാ പ്രേരണ, സ്ത്രീധന പീഡനം, ഗാര്ഹിക പീഡനം തുടങ്ങിയ വകുപ്പുകളാണു ചുമത്തിയിരിക്കുന്നത്.
മൃതദേഹങ്ങള് വിട്ടുകിട്ടുന്നതിനും നാട്ടിലേക്കു കൊണ്ടുപോകുന്നതിനുമായി ഇന്ന് അപേക്ഷ നല്കും. 17 നു നാട്ടിലെത്തിക്കാനാവുമെന്നാണു പ്രതീക്ഷയെന്നു ബന്ധുക്കള് പറഞ്ഞു. കഴിഞ്ഞ 9നാണു വിപഞ്ചികയെയും മകള് വൈഭവിയെയും ഷാര്ജയിലെ ഫ്ലാറ്റില് തൂങ്ങിമരിച്ച നിലയില് കണ്ടെത്തിയത്.
ഫോട്ടോ: ഷൈലജയും വിപഞ്ചികയും.
Related News
