മദീന - തീര്ഥാടകര്ക്കും സന്ദര്ശകര്ക്കുമായി 'നമ്മുടെ വനിതാ സന്ദര്ശകരെ പഠിപ്പിക്കുന്നത് നമ്മുടെ വനിതാ ജീവനക്കാര്ക്ക് ഒരു ബഹുമതി' എന്ന പേരില് പുതിയ പദ്ധതിക്ക് മതകാര്യ വകുപ്പ് പ്രസിഡന്റ് ഷെയ്ഖ് ഡോ. അബ്ദുല്റഹ്മാന് ബിന് അബ്ദുല് അസീസ് അല്-സുദൈസ് ഇന്നലെ തുടക്കം കുറിച്ചു. മദീനയിലെ പ്രസിഡന്സിയുടെ ശാഖയില് നടന്ന ചടങ്ങില് നിരവധി പ്രമുഖരും ഉദ്യോഗസ്ഥരും പങ്കെടുത്തു.
പ്രവാചകന്റെ പള്ളിയിലെ വനിതാകാര്യ ഏജന്സിയുടെ മേല്നോട്ടത്തില് ആരംഭിച്ച ഈ സംരംഭം, ഹജ് തീര്ഥാടകരുടെയും സന്ദര്ശകരുടെയും ഒഴുക്ക് വര്ധിക്കുന്ന സമയത്താണ് നടപ്പാക്കുന്നത്. പ്രവാചകന്റെ പള്ളിയുടെ പ്രാധാന്യം, മര്യാദകള്, നിയമങ്ങള് എന്നിവയെക്കുറിച്ച് വനിതാ സന്ദര്ശകരെ ബോധവല്ക്കരിക്കുക എന്നതാണ് പദ്ധതിയുടെ പ്രധാന ലക്ഷ്യം.
'അവബോധവും ഉള്ക്കാഴ്ചയും,' 'അറിവുള്ളവരോട് ചോദിക്കുക,' 'ശൈത്യകാലത്ത് മുസ്ലീം സ്ത്രീയുടെ കര്മ്മശാസ്ത്രം,' 'പ്രൊഫഷണലുകള്ക്ക് ഉള്ക്കാഴ്ച,' 'റൗദ: അടയാളങ്ങളും നിയമങ്ങളും' തുടങ്ങിയ നിരവധി ശാസ്ത്രീയ, വിദ്യാഭ്യാസ, വിജ്ഞാന പരിപാടികള് ഇതിന്റെ ഭാഗമായി നടക്കും. മിതമായ മൂല്യങ്ങളെയും സഹിഷ്ണുതയുടെ സന്ദേശങ്ങളെയും അടിസ്ഥാനമാക്കി ഭക്തിസാന്ദ്രമായ അന്തരീക്ഷം സൃഷ്ടിക്കാന് ഈ പരിപാടികള് സഹായിക്കുമെന്ന് അധികൃതര് അറിയിച്ചു.
Related News
