വാഷിംഗ്ടണ്‍ ഡി.സി- ഭൂമിയില്‍ നിന്ന് 154 പ്രകാശവര്‍ഷം അകലെ നിന്ന് ആവര്‍ത്തിച്ചുള്ള സിഗ്‌നലുകള്‍ പുറത്തുവിടുന്ന, നിഗൂഢമായ ഒരു 'സൂപ്പര്‍-എര്‍ത്ത്' ഗ്രഹത്തെ കണ്ടെത്തിയതായി നാസ പ്രഖ്യാപിച്ചു. TOI-1846 b എന്ന് പേരിട്ടിരിക്കുന്ന ഈ ഗ്രഹം ജ്യോതിശാസ്ത്രജ്ഞരെ അമ്പരിപ്പിച്ചിരിക്കുകയാണ്.

നാസ നല്‍കുന്ന വിവരമനുസരിച്ച്, ഈ ഗ്രഹത്തിന് ഭൂമിയുടെ ഇരട്ടി വലിപ്പവും നാലിരട്ടി പിണ്ഡവുമുണ്ട്. ഒരു ചെറിയ, തണുത്ത ചുവന്ന കുള്ളന്‍ നക്ഷത്രത്തെ ഇത് നാല് ദിവസം കൊണ്ട് ഒരു തവണ ചുറ്റിപ്പറ്റുന്നു. ഈ അടുത്ത ഭ്രമണപഥം കാരണം, നക്ഷത്രത്തിന്റെ പ്രകാശത്തില്‍ ഇടയ്ക്കിടെ വിചിത്രമായ കുറവുണ്ടാകുന്നു.

ബഹിരാകാശ ദൂരദര്‍ശിനികളും ഭൗമ ദൂരദര്‍ശിനികളും നടത്തിയ നിരീക്ഷണങ്ങളില്‍, ഈ ഗ്രഹം 'റേഡിയസ് ഗ്യാപ്പ്' എന്ന അപൂര്‍വ വിഭാഗത്തില്‍പ്പെടുന്നു എന്ന് കണ്ടെത്തിയിട്ടുണ്ട്. ഭൂമിയെപ്പോലെയുള്ള ചെറിയ പാറക്കെട്ടുകളുള്ള ഗ്രഹങ്ങള്‍ക്കും നെപ്റ്റിയൂണിനെപ്പോലെയുള്ള വലിയ വാതക ഗ്രഹങ്ങള്‍ക്കും ഇടയിലുള്ള ഒരു വിഭാഗമാണിത്.

TOI-1846 bയുടെ ഉപരിതല താപനില ഏകദേശം 600 ഡിഗ്രി ഫാരന്‍ഹൈറ്റ് (316 ഡിഗ്രി സെല്‍ഷ്യസ്) ആണെന്ന് കണക്കാക്കപ്പെടുന്നുണ്ടെങ്കിലും, അതില്‍ ജലത്തിന്റെ സാന്നിധ്യം ശാസ്ത്രജ്ഞര്‍ തള്ളിക്കളയുന്നില്ല. സൗരയൂഥത്തിലെ ബുധനെക്കാള്‍ വളരെ അടുത്താണ് ഈ ഗ്രഹം അതിന്റെ മാതൃനക്ഷത്രത്തെ ചുറ്റുന്നത്. ആതിഥേയ നക്ഷത്രത്തിന്റെ വലുപ്പവും പിണ്ഡവും സൂര്യന്റെ ഏകദേശം 40% മാത്രമാണ്.

ജെയിംസ് വെബ് ബഹിരാകാശ ദൂരദര്‍ശിനി ഉപയോഗിച്ച് ഈ ഗ്രഹത്തിന്റെ അന്തരീക്ഷം പഠിക്കാമെന്ന് നാസ ശാസ്ത്രജ്ഞര്‍ പ്രതീക്ഷിക്കുന്നു. നീരാവി, മീഥെയ്ന്‍, കാര്‍ബണ്‍ ഡയോക്‌സൈഡ് അല്ലെങ്കില്‍ മറ്റ് വാതകങ്ങള്‍ എന്നിവയുടെ സാന്നിധ്യം ഇന്‍ഫ്രാറെഡ് പ്രകാശത്തിലൂടെ കണ്ടെത്താനാണ് അവര്‍ ലക്ഷ്യമിടുന്നത്. TOI-1846 bയില്‍ നിന്ന് വരുന്ന ഈ നിഗൂഢ സിഗ്‌നലുകള്‍ക്ക് പിന്നിലെ രഹസ്യം കണ്ടെത്താന്‍ ഈ പഠനം സഹായിക്കുമെന്ന് കരുതുന്നു.