റിയാദ്: ലണ്ടനിലെ കേംബ്രിഡ്ജില്‍ സൗദി വിദ്യാര്‍ഥി കൊല്ലപ്പെട്ട സംഭവത്തില്‍ പിടിയിലായ ബ്രിട്ടീഷ് പൗരന്മാര്‍ക്കുമേല്‍ കൊലപാതകം, പൊതു ഇടത്തില്‍ ആയുധം കൈവശം വെക്കല്‍ എന്നീ കുറ്റങ്ങള്‍ ചുമത്തി കേസെടുത്തു. കഴിഞ്ഞ വെള്ളിയാഴ്ചയായിരുന്നു സൗദി പൗരന്‍ കൊല്ലപ്പെട്ടത്. അക്രമികള്‍ കൊലപാതകത്തിനിടെ വംശീയ വാക്യങ്ങള്‍ ഉപയോഗിച്ചിരുന്നെന്ന് ദൃക്‌സാക്ഷിയായ സഹപാഠി വെളിപ്പെടുത്തി. ബ്രിട്ടീഷ് പൗരന്മാരായ രണ്ട് പ്രതികളെയാണ് അറസ്റ്റ് ചെയ്തിട്ടുള്ളത്. ഒരാള്‍ ഒളിവിലാണ്. അറസ്റ്റിലായവരില്‍ ഒരാള്‍ക്ക് 21 വയസും രണ്ടാമന് 50 വയസുമാണ് പ്രായം. ബ്രിട്ടീഷ് പൊലീസിന്റെ നേതൃത്വത്തില്‍ വിശദ അന്വേഷണം പുരോഗമിക്കുകയാണ്.

കേംബ്രിഡ്ജിന് സമീപം പ്രവര്‍ത്തിക്കുന്ന സ്വകാര്യ ഇ എഫ് ഇന്റര്‍നാഷണല്‍ ഭാഷാ കോളേജിലെ വിദ്യാര്‍ഥിയാണ് കൊല്ലപ്പെട്ട മുഹമ്മദ് യൂസുഫ് അല്‍ ഖാസിം. 10 ആഴ്ചയോളം നീണ്ടു നില്‍ക്കുന്ന ഭാഷാ പഠന കോഴ്സിന് വേണ്ടിയാണ് 20കാരന്‍ ഭാഷാ കോളേജില്‍ എത്തുന്നത്. രാത്രി 11.30 ന് താമസ സ്ഥലത്തേക്ക് മടങ്ങുന്നതിനിടെ അക്രമികള്‍ ഇദ്ദേഹത്തെ വളയുകയായിരുന്നു.

സംഘര്‍ഷ സാഹചര്യം ഉണ്ടാക്കുകയും കുത്തി പരിക്കേല്‍പ്പിക്കുകയുമായിരുന്നുവെന്നാണ് പ്രാഥമിക കണ്ടെത്തല്‍. പരിക്കേറ്റ ഖാസിം സഹായത്തിനായി കരഞ്ഞിരുന്നു. സമീപ വാസികള്‍ ഓടിയെത്തുകയും പ്രാഥമിക സഹായം നല്‍കിയെന്നും സംഭവത്തിന് സാക്ഷിയായ സഹപാഠി അറിയിച്ചു. പെട്ടെന്ന് തന്നെ പൊലീസ് എത്തിയെങ്കിലും ആംബുലന്‍സ് എത്താന്‍ അരമണിക്കൂര്‍ വൈകിയെന്നും അദ്ദേഹം കൂട്ടിച്ചേര്‍ത്തു. കൊല്ലപ്പെട്ട വിദ്യാര്‍ഥിയുടെ മൃതദേഹം പോസ്റ്റുമോര്‍ട്ടം നടപടികള്‍ പൂര്‍ത്തിയാക്കി സൗദിയിലേക്ക് കൊണ്ടുവരുന്നതിനുള്ള നടപടികള്‍ സൗദി എംബസിയുടെ നേതൃത്വത്തില്‍ പുരോഗമിക്കുകയാണ്.

ഫോട്ടോ: കൊല്ലപ്പെട്ട മുഹമ്മദ് യൂസുഫ് അല്‍ ഖാസിം.