മക്ക: ലഹരിമരുന്ന് കടത്തിയതിന് നൈജീരിയന് പൗരന്റെ വധശിക്ഷ സൗദി അറേബ്യയില് നടപ്പാക്കി. മക്കയില് വെച്ചാണ് മുഹമ്മദ് മുഹമ്മദ് അബൂബക്കര് എന്നയാളുടെ വധശിക്ഷ നടപ്പാക്കിയത്. കൊക്കെയ്ന് രാജ്യത്തേക്ക് കടത്താന് ശ്രമിച്ചതിനാണ് ഇയാള്ക്ക് വധശിക്ഷ വിധിച്ചത്.
ലഹരിമരുന്ന് കടത്ത് പിടികൂടിയ സുരക്ഷാ ഉദ്യോഗസ്ഥര് പ്രതിയെ അറസ്റ്റ് ചെയ്യുകയും തുടര്ന്ന് നടത്തിയ അന്വേഷണത്തില് കുറ്റം തെളിയിക്കുകയും ചെയ്തു. കേസ് കോടതിയുടെ പരിഗണനയില് വന്ന ശേഷം, ഇയാള് കുറ്റക്കാരനാണെന്ന് കണ്ടെത്തി വധശിക്ഷ നല്കാന് ഉത്തരവിട്ടു. അപ്പീല് കോടതിയും സുപ്രീം കോടതിയും ഈ വിധി ശരിവെച്ചതിനെ തുടര്ന്ന് ശിക്ഷ നടപ്പാക്കാന് രാജകീയ ഉത്തരവ് പുറപ്പെടുവിക്കുകയായിരുന്നു.
ബുധനാഴ്ച, 1447 ദുല്-ഹിജ്ജ 2, (ഓഗസ്റ്റ് 6, 2025) നാണ് മക്കയില് ശിക്ഷ നടപ്പാക്കിയത്.
മയക്കുമരുന്ന് കടത്തുന്നവര്ക്കും വിതരണം ചെയ്യുന്നവര്ക്കും സൗദി അറേബ്യ കര്ശനമായ ശിക്ഷ നല്കുമെന്ന് ആഭ്യന്തര മന്ത്രാലയം പ്രസ്താവനയിലൂടെ അറിയിച്ചു. ലഹരിവസ്തുക്കള് നിരപരാധികളുടെ ജീവന് നശിപ്പിക്കുകയും യുവാക്കളെയും സമൂഹത്തെയും ഗുരുതരമായി ബാധിക്കുകയും ചെയ്യുന്നതിനാല്, അതില് നിന്ന് പൗരന്മാരെയും പ്രവാസികളെയും സംരക്ഷിക്കാന് സര്ക്കാര് പ്രതിജ്ഞാബദ്ധമാണ്. ഇത്തരം കുറ്റകൃത്യങ്ങളില് ഏര്പ്പെടുന്നവര്ക്ക് നിയമപ്രകാരമുള്ള ശിക്ഷ ലഭിക്കുമെന്നും മന്ത്രാലയം മുന്നറിയിപ്പ് നല്കി.
Related News
