ഡെറാഡൂണ്: ഉത്തരാഖണ്ഡിലെ ധരാലി ഗ്രാമത്തില് മേഘവിസ്ഫോടനത്തെ തുടര്ന്നുണ്ടായ പ്രളയത്തില് രക്ഷാപ്രവര്ത്തനം പുരോഗമിക്കുകയാണ്. കനത്ത മഴ തുടരുന്നതിനിടയിലും സൈന്യം രംഗത്തുണ്ട്. ഇതുവരെ ഒരു മൃതദേഹം കണ്ടെടുത്തതായി ഉദ്യോഗസ്ഥര് അറിയിച്ചു.
ദുരന്തത്തില് നാല് പേര് മരിച്ചതായി ഔദ്യോഗികമായി സ്ഥിരീകരിച്ചിട്ടുണ്ട്. അറുപതിലധികം പേരെ കാണാതായിട്ടുണ്ട്. ഈ സംഖ്യ ഇനിയും കൂടാന് സാധ്യതയുണ്ടെന്നാണ് റിപ്പോര്ട്ടുകള്. പ്രളയജലത്തില് നിരവധി വീടുകളും വാഹനങ്ങളും ഒലിച്ചുപോയി. പ്രദേശത്തേക്കുള്ള പ്രധാന റോഡുകള് മണ്ണിടിച്ചിലിനെ തുടര്ന്ന് തടസ്സപ്പെട്ടതിനാല് രക്ഷാപ്രവര്ത്തനം ദുഷ്കരമാണ്.
ധരാലി ഗ്രാമത്തിലെ ഖീര് ഗംഗാ നദിയുടെ വൃഷ്ടിപ്രദേശത്താണ് മേഘവിസ്ഫോടനം ഉണ്ടായത്. ഗംഗോത്രിയിലേക്കുള്ള യാത്രാ പാതയിലെ ഒരു പ്രധാന ഇടത്താവളമാണ് ഈ ഗ്രാമം. ഹര്ഷിലിലെ സൈനിക ക്യാമ്പില് നിന്ന് 11 സൈനികരെയും കാണാതായിട്ടുണ്ട്.
പ്രധാനമന്ത്രി നരേന്ദ്ര മോദി ഉത്തരാഖണ്ഡ് മുഖ്യമന്ത്രി പുഷ്കര് സിംഗ് ധാമിയുമായി സംസാരിക്കുകയും എല്ലാ സഹായവും വാഗ്ദാനം ചെയ്യുകയും ചെയ്തു. മുഖ്യമന്ത്രി ധാമിയും ദുരന്തബാധിത പ്രദേശങ്ങളില് വ്യോമനിരീക്ഷണം നടത്തി സ്ഥിതിഗതികള് വിലയിരുത്തി.
അതിനിടെ, മണ്ണിനടിയില് കുടുങ്ങിയവരെ കണ്ടെത്താന് മൃതദേഹങ്ങള് കണ്ടെത്തുന്നതിന് പരിശീലനം ലഭിച്ച നായകളെ ദല്ഹിയില് നിന്ന് വ്യോമമാര്ഗം എത്തിക്കുമെന്ന് എന്ഡിആര്എഫ് അറിയിച്ചു. സൈന്യം, എന്ഡിആര്എഫ്, ഐടിബിപി, സംസ്ഥാന ദുരന്ത നിവാരണ സേന എന്നിവ സംയുക്തമായാണ് രക്ഷാപ്രവര്ത്തനങ്ങള്ക്ക് നേതൃത്വം നല്കുന്നത്.
Related News
