ദോഹ: ഗാസയില്‍ വെടിനിര്‍ത്തലിന്റെ അടിയന്തര പ്രാധാന്യവും മാനുഷിക സഹായം ലഭ്യമാക്കുന്നതും സംബന്ധിച്ച് യു കെ പ്രധാനമന്ത്രി കെയര്‍ സ്റ്റാര്‍മറുമായി ചര്‍ച്ച നടത്തി ഖത്തര്‍ അമീര്‍ ഷെയ്ഖ് തമീം ബിന്‍ ഹമദ് അല്‍താനി. വെടിനിര്‍ത്തല്‍, ഉഭയകക്ഷി സഹകരണം, വികസനം എന്നിവ അനിവാര്യമാണെന്ന് ഇരുവരും നടത്തിയ ടെലിഫോണ്‍ സംഭാഷണത്തില്‍ വ്യക്തമാക്കി. ഗസയിലെ നിലവിലെ സ്ഥിതിഗതികള്‍ ഇരു നേതാക്കളും ചര്‍ച്ച ചെയ്തു. ഇരു രാജ്യങ്ങളും തമ്മിലുള്ള ഉഭയകക്ഷി സഹകരണബന്ധം മെച്ചപ്പെടുത്തുന്നതിനെക്കുറിച്ചും പരസ്പരം ചര്‍ച്ച ചെയ്തു. കഴിഞ്ഞ ദിവസം യുകെ പ്രധാനമന്ത്രിയുമായുള്ള ഫോണ്‍ സംഭാഷണത്തിനിടെയാണ് ഇക്കാര്യങ്ങള്‍ ചര്‍ച്ച ചെയ്തത്.

ഫലസ്തീന്‍ പ്രദേശങ്ങളിലെയും ഗാസ മുനമ്പിലെയും ജനങ്ങള്‍ക്ക് മതിയായ മാനുഷിക സഹായം എത്തുന്നുണ്ടെന്ന് ഉറപ്പാക്കേണ്ടതുണ്ടെന്നു ഇരു രാഷ്ട്രത്തലവന്മാരും അഭിപ്രായപ്പെട്ടു. വെടിനിര്‍ത്തല്‍ ഉടനടി നടപ്പാക്കേണ്ടതുണ്ട്. ഗാസയിന്‍ അത്രയേറെ ദുരിതമാണ് ജനങ്ങള്‍ അനുഭവിക്കുന്നതെന്നും ഇരുവരും പറഞ്ഞു. ഫലസ്തീനെ സ്വതന്ത്ര രാഷ്ട്രമായി അംഗീകരിക്കാന്‍ തങ്ങള്‍ തയ്യാറാണെന്ന് നേരത്തെ ബ്രിട്ടീഷ് പ്രധാനമന്ത്രി കെയര്‍ സ്റ്റാര്‍മര്‍ വ്യക്തമാക്കിയിരുന്നു.