റിയാദ്: റിയാദിലെ റെസിഡന്‍ഷ്യല്‍ ഏരിയകളിലെ പാര്‍ക്കിംഗ് നിയന്ത്രിക്കുന്നതിനുള്ള പുതിയ സംവിധാനം ഇന്നു മുതല്‍ പ്രാബല്യത്തില്‍ വരും. മാനേജ്ഡ് പാര്‍ക്കിംഗ് സിസ്റ്റം റിയാദ് പാര്‍ക്കിംഗ് ആപ്പ് വഴി താമസക്കാര്‍ക്കും സന്ദര്‍ശകര്‍ക്കും ഫീസ് കൂടാതെ ഡിജിറ്റല്‍ പെര്‍മിറ്റുകള്‍ നല്‍കുന്ന സംവിധാനമാണ് നിലവില്‍ വരുന്നത്. തിരക്ക് കുറയ്ക്കുന്നതിനും പ്രധാന റോഡുകളില്‍ നിന്നുള്ള വാഹനങ്ങള്‍ പാര്‍പ്പിട കേന്ദ്രങ്ങളിലേക്ക് ഒഴുകുന്നത് തടയുന്നതിനുമാണ് പുതിയ സംവിധാനമെന്ന് അധികൃതര്‍ വ്യക്തമാക്കി.

പുതിയ സംവിധാനം തുടക്കത്തില്‍ അല്‍-വുറുദ് മേഖലയിലാണ് നടപ്പാക്കുന്നത്. നിലവിലുള്ള പെയ്ഡ് പാര്‍ക്കിംഗ് സോണുകള്‍ക്ക് സമീപമുള്ള മറ്റ് പ്രദേശങ്ങളിലേക്ക് പദ്ധതി പിന്നീട് വ്യാപിപ്പിക്കും. സുസ്ഥിര സാമൂഹിക നഗര അന്തരീക്ഷം സൃഷ്ടിക്കുന്നതിനും താമസക്കാരുടെ ജീവിത നിലവാരം മെച്ചപ്പെടുത്തുന്നതിനുമുള്ള സൗദി വിഷന്‍ 2030 ലക്ഷ്യത്തിന്റെ ഭാഗമാണിത്.

2024ല്‍ തലസ്ഥാനത്തെ ചില തെരുവുകളില്‍ പണമടച്ചുള്ള പാര്‍ക്കിംഗ് സംവിധാനം ഏര്‍പ്പെടുത്തിയതിന് പിന്നാലെയാണ് ഈ പദ്ധതി നടപ്പാക്കുന്നത്. പുതിയ മേഖലകൡലേക്കു കൂടി പണമടച്ചുള്ള പാര്‍ക്കിംഗ് സംവിധാനം വ്യാപിപ്പിക്കുന്നുണ്ട്. പ്രിന്‍സ് മൊസാദ് ബിന്‍ ജലാവി റോഡില്‍ കിംഗ് അബ്ദുല്‍ അസീസ് റോഡിനും മക്ക അല്‍-മുഖറമ റോഡിനും ഇടയിലുള്ള രണ്ട് ദിശകളിലുമുള്ള ഭാഗങ്ങളിലാണ് പണമടച്ചുള്ള പാര്‍ക്കിംഗ് ഇന്നു മുതല്‍ പ്രാബല്യത്തില്‍ വരുന്നത്. കിംഗ് അബ്ദുല്‍ അസീസ് റോഡ് മുതല്‍ പ്രിന്‍സ് എംസാദ് ബിന്‍ ജലാവി റോഡ് കവല വരെയുള്ള മക്ക റോഡിലും പാര്‍ക്കിംഗിനും ഇന്നു മുതല്‍ പണം അടക്കേണ്ടി വരും.

ദേശീയ നഫാത്ത് പ്ലാറ്റ്ഫോമുമായി ബന്ധിപ്പിച്ചിട്ടുള്ളതാണ് റിയാദ് പാര്‍ക്കിംഗ് ആപ്പ്. ഇതിലൂടെ താമസക്കാര്‍ക്ക് വളരെ എളുപ്പം പാര്‍ക്കിംഗിന് പണം അടക്കാനാവും. പാര്‍ക്കിംഗ് നിയന്ത്രണങ്ങള്‍ ശരിയാംവണ്ണം പാലിക്കുന്നുണ്ടോ എന്നു നിരീക്ഷിക്കുന്നതിന് ക്യാമറകള്‍ ഘടിപ്പിച്ച നിരീക്ഷണ വാഹനങ്ങളുണ്ടാകും. തലസ്ഥാന നഗരിയില്‍ 140,000-ത്തിലധികം പണമടച്ചുള്ള റെസിഡന്‍ഷ്യല്‍ സ്പെയ്സുകളും 24,000 പണമടച്ചുള്ള വാണിജ്യ സ്പെയ്സുകളുമാണുള്ളത്.