ജിദ്ദ: സൗദിയില്‍ നടന്നു വരുന്ന ഫിബ ഏഷ്യാ കപ്പ് പുരുഷ ബാസ്‌കറ്റ്ബാള്‍ ചാമ്പ്യന്‍ഷിപ്പില്‍ നിന്ന് ഇന്ത്യ പുറത്തായി. ശനിയാഴ്ച്ച ജിദ്ദ കിംഗ് അബ്ദുള്ള സ്പോര്‍ട്സ് സിറ്റിയില്‍ നടന്ന ഗ്രൂപ്പ്-സി മത്സരത്തില്‍ 59-84 എന്ന സ്‌കോറിന് ആതിഥേയരായ സൗദി അറേബ്യയോട് പരാജയപ്പെട്ടതോടെയാണ് ടൂര്‍ണമെന്റില്‍ നിന്ന് ഇന്ത്യ പുറത്തായത്.

നേരത്തെ ചൈന, ജോര്‍ദാന്‍ ടീമുകളോടും ഇന്ത്യ പരാജയപ്പെട്ടിരുന്നു. ഇതോടെ ഗ്രൂപ്പില്‍ ഒന്നാമതെത്തിയ ചൈന നേരിട്ട് നോക്കൗട്ടില്‍ (ക്വാര്‍ട്ടര്‍ ഫൈനല്‍) പ്രവേശിച്ചപ്പോള്‍ സൗദി അറേബ്യ രണ്ടാം സ്ഥാനത്തും ജോര്‍ദാന്‍ മൂന്നാം സ്ഥാനത്തും ഫിനിഷ് ചെയ്തു.

ഇന്ത്യ-സൗദി മത്സരത്തിന്റെ ആദ്യ പാദത്തില്‍ ഇന്ത്യ 24-25 എന്ന സ്‌കോറില്‍ മികച്ച പോരാട്ടം കാഴ്ചവച്ചു. പല്‍പ്രീത് സിംഗ് ബ്രാര്‍ പ്രതിരോധത്തില്‍ പ്രധാന പങ്കുവഹിക്കുകയും കൃത്യമായ ഇടവേളകളില്‍ രണ്ട് പോയിന്റുകള്‍ നേടുകയും ചെയ്തു. രണ്ടാം പാദത്തില്‍ ആതിഥേയരായ സൗദി ടീം മികച്ച പ്രകടനം പുറത്തെടുത്തു അവര്‍ 14 പോയിന്റ് ലീഡ് നേടി (41-35). പിന്നീട് സൗദി ടീം സ്ഥിരമായി സ്‌കോര്‍ ചെയ്തുകൊണ്ട് സമ്മര്‍ദ്ദം ചെലുത്തുന്നത് തുടര്‍ന്ന ഇന്ത്യക്ക് പിന്നീട് മുന്നേറാനായില്ല.

ഇന്ത്യന്‍ ടീമിനായി പല്‍പ്രീത് സിംഗ് ബ്രാര്‍ 20 പോയിന്റുകള്‍ നേടി. സൗദി അറേബ്യയ്ക്കുവേണ്ടി മുഹമ്മദ് അല്‍സുവൈലേം 15 പോയിന്റുമായി ടോപ് സ്‌കോറര്‍ ആയി.