ചെന്നൈ: കേരളത്തില് നിന്നുള്ള എം.പിമാരടക്കം യാത്ര ചെയ്ത എയര് ഇന്ത്യ വിമാനം ചെന്നൈയില് അടിയന്തരമായി ഇറക്കി. തിരുവനന്തപുരത്ത് നിന്ന് ഡല്ഹിക്ക് പുറപ്പെട്ട എയര് ഇന്ത്യയുടെ എ.ഐ 2455 വിമാനമാണ് കാലാവസ്ഥ റഡാര് തകരാറിനെ തുടര്ന്ന് ചെന്നൈ രാജ്യാന്തര വിമാനത്താവളത്തില് ഇറക്കിയത്.
കെ.സി. വേണുഗോപാല്, കൊടിക്കുന്നില് സുരേഷ്, അടൂര് പ്രകാശ്, കെ. രാധാകൃഷ്ണന്, തമിഴ്നാട് തിരുനെല്വേലിയില് നിന്നുള്ള റോബര്ട്ട് ബ്രൂസ് എന്നീ എം.പിമാരും അഡീഷനല് ചീഫ് സെക്രട്ടറി (ധനകാര്യം) ജ്യോതിലാലും അടക്കമുള്ളവരാണ് വിമാനത്തില് ഉണ്ടായിരുന്നത്. യാത്രക്കാര് സുരക്ഷിതരെന്ന് വിമാന അധികൃതര് അറിയിച്ചു. യാത്രക്കാരെല്ലാം സുരക്ഷിതരാണെന്ന് കൊടുക്കുന്നില് സുരേഷ് എം.പിയും ഫേസ് ബുക്കില് കുറിച്ചു.
വൈകിട്ട് 7.15ന് തിരുവനന്തപുരത്ത് നിന്ന് പുറപ്പെടേണ്ട വിമാനം അര മണിക്കൂറോളം വൈകിയിരുന്നു. യാത്ര പുറപ്പെട്ടതിന് പിന്നാലെ വിമാനത്തിന് സാങ്കേതിക തകരാര് ഉണ്ടെന്നും അടിയന്തരമായി ഇറക്കുകയാണെന്നും പൈലറ്റ് യാത്രക്കാരെ അറിയിച്ചു. ഒരു മണിക്കൂറോളം പറന്ന ശേഷം ചെന്നൈയില് രണ്ട് തവണ വിമാനം നിലത്തിറക്കാന് ശ്രമിച്ചു. റണ്വേയില് മറ്റൊരു വിമാനം ഉണ്ടായിരുന്നതിനാല് ആദ്യശ്രമം പാളി. അര മണിക്കൂര് വീണ്ടും ചെന്നൈ വിമാനത്താവളത്തിന് മുകളില് പറന്ന ശേഷമാണ് ലാന്ഡ് ചെയ്യാനായത്. ലാന്റിംഗിനി ശ്രമിക്കവെ മറ്റൊരു വിമാനം റണ്വേയില് ഉണ്ടായതും വിമാനം വീണ്ടും ഉയര്ത്താനായും വഴി വന് ദുരന്തമാണ് ഒഴിവായത്.
വിമാനം അടിയന്തരമായ ലാന്ഡ് ചെയ്ത സംഭവത്തില് രൂക്ഷമായി പ്രതികരിച്ച് കെ സി വേണുഗോപാലും അടൂര് പ്രകാശുമടക്കമുള്ള എം പിമാര് രംഗത്തെത്തി. അടിയന്തര ലാന്ഡിംഗിനിടെ വന് ദുരന്തത്തില് നിന്ന് രക്ഷപ്പെട്ടെന്നാണ് കെ സി വേണുഗോപാല് പറഞ്ഞത്. അടിയന്തര ലാന്ഡിംഗില് ഗുരുതര സുരക്ഷ വീഴ്ച ഉണ്ടായെന്നും അന്വേഷണം നടത്തണമെന്നും അദ്ദേഹം ആവശ്യപ്പെട്ടു. രണ്ട് മണിക്കൂറോളം സമയം ചെന്നൈയ്ക്ക് മുകളില് പറന്നെന്നാണ് അടൂര് പ്രകാശ് വിവരിച്ചത്.
അതിനിടെ വിഷയത്തില് പ്രതികരിച്ച് എയര് ഇന്ത്യയും രംഗത്തെത്തി. സാങ്കേതിക പ്രശ്നത്തെ തുടര്ന്നുള്ള മുന്കരുതലിനായാണ് ചെന്നൈക്ക് വഴിതിരിച്ച് വിട്ടതെന്നും അടിയന്തര ലാന്ഡിംഗ് നടത്തിയതെന്നുമാണ് എയര് ഇന്ത്യ പറയുന്നത്. ചെന്നൈയില് വിമാനത്തിന്റെ പരിശോധന നടത്തുന്നുവെന്നും പകരം സൗകര്യം സജ്ജമാക്കിയെന്നും എയര് ഇന്ത്യ വക്താവ് അറിയിച്ചു. എം പിമാരടക്കം 160 പേരുടെയും പരിശോധന പൂര്ത്തിയാക്കി ഉടന് തന്നെ മറ്റൊരു വിമാനത്തില് യാത്ര ക്രമീകരിച്ചെന്നും എയര് ഇന്ത്യ വക്താവ് വെളിപ്പെടുത്തി.
Related News
