റിയാദ്: സൗദിയില് തൊഴില് വിസ സ്റ്റാമ്പിങ്ങിനായി കൂടുതല് പ്രൊഫഷനുകള്ക്ക് പരീക്ഷ നിര്ബന്ധമാക്കി. ലേബര്, ലോഡിങ് അണ് ലോഡിങ് തുടങ്ങിയ വിസകള്ക്കും ഇതോടെ പരീക്ഷ നിര്ബന്ധമായി. ഈ പ്രൊഫഷനുകളിലുള്ളവര്ക്ക് പരീക്ഷ എഴുതാന് ചെന്നൈക്കു പോകേണ്ടി വരും. കേരളത്തില് സെന്ററില്ലാത്തതിനാലാണിത്. സെന്ററുകള് കേരളത്തില് ലഭിക്കാന് എംപിമാരും കേന്ദ്രവും ഇടപെടണമെന്ന ആവശ്യം ശക്തമാണെങ്കിലും സെന്റര് അനുവദിച്ചിട്ടില്ല.
തൊഴില് മേഖലയെ നവീകരിക്കുന്നതിന്റെ ഭാഗമായാണ് സൗദി മന്ത്രാലയം കൂടുതല് പ്രൊഫഷനുകള്ക്ക് പരീക്ഷ നിര്ബന്ധമാക്കിയത്. നിലവില് വിവിധ പ്രൊഫഷനുകള്ക്കായി കേരളത്തിലടക്കം വിവിധ സംസ്ഥാനങ്ങളില് പരീക്ഷ കേന്ദ്രങ്ങളും, ട്രെയിനിങ് സംവിധാനങ്ങളുമുണ്ടെങ്കിലും എല്ലാ പ്രൊഫഷനുകള്ക്കും കേരളത്തില് സെന്റര് ഇല്ല. ഇലക്ട്രീഷ്യന്, പ്ലംബര്, വെല്ഡര് തുടങ്ങിയ ജോലികള്ക്കും കണ്സ്ട്രക്ഷന്, വര്ക്ഷോപ്പ്, ഫുഡ് സെര്വര്, തട്ടാന്, ഷെഫ്, പൈപ് ഇന്സ്റ്റാളര് തുടങ്ങി 22 പ്രൊഫഷനുകള്ക്ക് കേരളത്തില് പരീക്ഷക്കിരിക്കാം. ഏതാനും പ്രൊഫഷനുകള്ക്ക് മുംബൈ, ഡല്ഹി, കൊല്ക്കത്ത തുടങ്ങിയ നഗരങ്ങളിലും സെന്ററുണ്ട്. ഏജന്സികള് വഴിയാണ് നിലവില് പരീക്ഷാ നടപടികള് പൂര്ത്തിയാക്കുന്നത്. പരീക്ഷ വിജയിച്ചതിന് ശേഷം വിഎഫ്എസ് വഴി ബയോമെട്രിക് പൂര്ത്തിയാക്കി വിസ സ്റ്റാമ്പ് ചെയ്യാം. വിജയിച്ചവര്ക്ക് പ്രത്യേക സര്ട്ടിഫിക്കറ്റുകളും ലഭ്യമാകും.
Related News
