ശ്രീനഗര്: ജമ്മുകശ്മീരിലെ കിഷ്ത്വാറില് മേഘവിസ്ഫോടനത്തെ തുടര്ന്നുണ്ടായ മിന്നല് പ്രളയത്തില് മരണം 40 ആയി ഉയര്ന്നു. 220ല് അധികം പേരെ കാണാനില്ലെന്ന് റിപ്പോര്ട്ടുണ്ട്. 50ലേറെ പേര്ക്ക് പരിക്കേറ്റു. മരിച്ചവരില് രണ്ട് പേര് സിഐഎസ്എഫ് ജവാന്മാരും ഉള്പ്പെടും.
ചോസ്തി, ഗാണ്ടര്ബാള്, പഹല്ഗാം മേഖലകളിലാണ് മേഘവിസ്ഫോടനം ഉണ്ടായത്. സൈന്യവും, എന്ഡിആര്എഫിന്റെ രണ്ട് സംഘങ്ങളും രക്ഷാപ്രവര്ത്തനത്തിനുണ്ട്. സ്ഥിതിഗതികള് വിലയിരുത്തിയ കേന്ദ്ര ആഭ്യന്തരമന്ത്രി അമിത് ഷാ സാധ്യമായ എല്ലാ സഹായവും ഉറപ്പു നല്കി.
ഉത്തരേന്ത്യന് സംസ്ഥാനങ്ങളില് ശക്തമായ മഴ തുടരുകയാണ്. ഹിമാചല്പ്രദേശില് മിന്നല് പ്രളയമുണ്ടായി. ഷിംലയില് രണ്ടിടങ്ങളില് മണ്ണിടിഞ്ഞു. കുളു, ഷിംല, ലാഹൗള്-സ്പിറ്റി തുടങ്ങിയ ജില്ലകളില് കനത്ത നാശനഷ്ടമുണ്ടായതായാണ് റിപ്പോര്ട്ട്. മേഘവിസ്ഫോടനത്തെ തുടര്ന്നുണ്ടായ മിന്നല്പ്രളയത്തെ തുടര്ന്ന് വിവിധ സ്ഥലങ്ങളില്നിന്ന് ആളുകളെ ഒഴിപ്പിച്ചു.
മിന്നല്പ്രളയത്തില് തീര്ഥന് നദിയിലെ ജലനിരപ്പ് ഉയര്ന്നതിനാല് താഴ്ന്ന പ്രദേശത്ത് കഴിയുന്നവരെയും കുളു ജില്ലാ ഭരണക്കൂടം ഒഴിപ്പിച്ചു. കുളു ജില്ലയില് മാത്രം ബാഗിപുല്, ബട്ടാഹര് എന്നീ പ്രദേശങ്ങളില് മേഘവിസ്ഫോടനം റിപ്പോര്ട്ട് ചെയ്തു. ഇരുപ്രദേശങ്ങളിലും ഇതുവരെ ആളപായം റിപ്പോര്ട്ട് ചെയ്തിട്ടില്ലെങ്കിലും ഒട്ടേറെ കെട്ടിടങ്ങള്ക്ക് നാശം സംഭവിച്ചിട്ടുണ്ട്.
Related News
