റിയാദ്: സൗദി അറേബ്യയിലെ സ്കൂളുകളിലെ അധ്യാപകര് ഉള്പ്പെടെയുള്ള മുഴുവന് ജീവനക്കാരുടെയും ഹാജര് വിവരങ്ങള് രേഖപ്പെടുത്തുന്നതിനായി നൂതന ഇലക്ട്രോണിക് സംവിധാനം ആരംഭിച്ചതായി വിദ്യാഭ്യാസ മന്ത്രാലയം പ്രഖ്യാപിച്ചു. 'ഹൊദോരി' (Hodori) എന്ന് പേരിട്ടിട്ടുള്ള ഈ സംവിധാനം രാജ്യത്തുടനീളം ഘട്ടംഘട്ടമായി നടപ്പിലാക്കും.
ആദ്യഘട്ടത്തില്, കിഴക്കന് പ്രവിശ്യ, അല്-അഹ്സ, ജിദ്ദ, മക്ക, ഖസീം എന്നിവിടങ്ങളിലെ സ്കൂളുകളില് ഈ സംവിധാനം നിലവില് വന്നു. രണ്ടാം ഘട്ടമായി, ഓഗസ്റ്റ് 24-ന് താഇഫ്, തബൂക്ക്, അല്-ജൗഫ്, വടക്കന് അതിര്ത്തി പ്രവിശ്യ എന്നിവിടങ്ങളില് ഇത് നടപ്പാക്കും.
ഓഗസ്റ്റ് 31-ന് ഹായില്, നജ്റാന്, അസീര്, ജിസാന് എന്നിവിടങ്ങളില് ആപ്ലിക്കേഷന് ലഭ്യമാകും. റിയാദ്, അല്-ബാഹ എന്നിവിടങ്ങളിലായിരിക്കും ഏറ്റവും അവസാനമായി ഈ സംവിധാനം നടപ്പിലാക്കുക. സെപ്റ്റംബര് 7-നാണ് ഇത് നിലവില് വരുന്നത്.
'ഹൊദോരി' ആപ്ലിക്കേഷന് വഴി ജീവനക്കാരുടെ ഹാജര് (സ്കൂളിലെത്തുന്ന സമയവും മടങ്ങുന്ന സമയവും) പൂര്ണമായും ഡിജിറ്റല് രൂപത്തില് രേഖപ്പെടുത്തും. ജിപിഎസ്, ബയോമെട്രിക് സാങ്കേതികവിദ്യകള് ഉപയോഗിച്ചാണ് ജീവനക്കാരുടെ ഹാജര് കൃത്യമായി രേഖപ്പെടുത്തുന്നത്. ഇത് പരമ്പരാഗതമായ കൈകാര്യങ്ങളിലുള്ള ബുദ്ധിമുട്ടുകള് ഒഴിവാക്കി സമയം ലാഭിക്കാനും വേഗത്തില് വിവരങ്ങള് ലഭ്യമാക്കാനും സഹായിക്കും.
ഈ സംവിധാനം സ്കൂളുകളിലെ അധ്യാപക-അഡ്മിനിസ്ട്രേറ്റീവ് ജീവനക്കാര് ഉള്പ്പെടെ എല്ലാവര്ക്കും ബാധകമാണ്. ആപ്ലിക്കേഷന് 'Hodori' അല്ലെങ്കില് 'Huduri' എന്ന പേരില് ഐഫോണ്, ആന്ഡ്രോയിഡ്, വാവെ ഉപകരണങ്ങള്ക്കുള്ള ഔദ്യോഗിക ആപ്പ് സ്റ്റോറുകളില് ലഭ്യമാണ്.
ഉപയോക്താക്കള്ക്ക് മന്ത്രാലയത്തിന്റെ ഏകീകൃത ലോഗിന് വിവരങ്ങള് (മിനിസ്റ്റീരിയല് ഇമെയില്) അല്ലെങ്കില് ഏകീകൃത ദേശീയ ആക്സസ് വഴിയോ ലോഗിന് ചെയ്യാന് സാധിക്കും. ആദ്യമായി ഉപയോഗിക്കുമ്പോള്, ജീവനക്കാര് അവരുടെ ബയോമെട്രിക് വിവരങ്ങള് നല്കണം. ഇത് പിന്നീട് ഉപയോഗിക്കാനായി സിസ്റ്റത്തില് സൂക്ഷിക്കും.
രജിസ്ട്രേഷന് പൂര്ത്തിയാക്കിയ ശേഷം, ആപ്ലിക്കേഷന് മാനേജരുടെ അംഗീകാരത്തിനായി അയക്കും. അംഗീകാരം ലഭിച്ചുകഴിഞ്ഞാല്, ജീവനക്കാര്ക്ക് അവരുടെ മൊബൈല് ഫോണ് ഉപയോഗിച്ച് നേരിട്ട് സമയം രേഖപ്പെടുത്താന് സാധിക്കും.
Related News
