ന്യൂദല്ഹി: മുഖ്യ തിരഞ്ഞെടുപ്പ് കമ്മീഷണര് ഗ്യാനേഷ് കുമാറിനെതിരെ ഇംപീച്ച്മെന്റ് പ്രമേയം കൊണ്ടുവരാന് 'ഇന്ത്യ' മുന്നണി ആലോചിക്കുന്നു. ഇന്ന് ചേര്ന്ന 'ഇന്ത്യ' മുന്നണിയിലെ കക്ഷി നേതാക്കളുടെ യോഗത്തിലാണ് തീരുമാനം. വലിയ രീതിയിലുള്ള വോട്ടു മോഷണം നടക്കുന്നുവെന്നും തിരഞ്ഞെടുപ്പ് കമ്മീഷന് ഭരണകക്ഷിക്ക് അനുകൂലമായി പ്രവര്ത്തിക്കുന്നുവെന്നും കോണ്ഗ്രസ് ആരോപണം ഉന്നയിച്ചതിന് പിന്നാലെയാണ് ഈ നീക്കം.
കഴിഞ്ഞ ദിവസം ദല്ഹിയില് നടന്ന വാര്ത്താ സമ്മേളനത്തില് തിരഞ്ഞെടുപ്പ് കമ്മീഷന് കോണ്ഗ്രസിന്റെ ആരോപണങ്ങള് തള്ളിയിരുന്നു. തൊട്ടുപിന്നാലെയാണ് പ്രതിപക്ഷം ശക്തമായ നിലപാടുമായി രംഗത്തെത്തിയിരിക്കുന്നത്.
2023-ലെ 'ചീഫ് ഇലക്ഷന് കമ്മീഷണര് ആന്ഡ് അദര് ഇലക്ഷന് കമ്മീഷണര്മാര് (അപ്പോയിന്റ്മെന്റ്, കണ്ടീഷന്സ് ഓഫ് സര്വീസ് ആന്ഡ് ടേം ഓഫ് ഓഫീസ്) നിയമം' അനുസരിച്ച്, ഒരു സുപ്രീം കോടതി ജഡ്ജിയെ നീക്കം ചെയ്യുന്ന അതേ രീതിയിലും കാരണങ്ങളിലുമാണ് മുഖ്യ തിരഞ്ഞെടുപ്പ് കമ്മീഷണറെയും നീക്കം ചെയ്യാന് സാധിക്കുന്നത്. അതായത്, പാര്ലമെന്റിന്റെ ഇരുസഭകളിലും മൂന്നില് രണ്ട് ഭൂരിപക്ഷത്തോടെയുള്ള പ്രമേയത്തിലൂടെ മാത്രമേ അദ്ദേഹത്തെ നീക്കം ചെയ്യാനാകൂ. പ്രമേയം അംഗീകരിക്കപ്പെടണമെങ്കില് കുറഞ്ഞത് 50 അംഗങ്ങളെങ്കിലും അതിന് അനുകൂലമായി ഒപ്പിടേണ്ടതുണ്ട്.
പ്രമേയം പാസാക്കാനുള്ള ഭൂരിപക്ഷം പ്രതിപക്ഷത്തിന് നിലവില് പാര്ലമെന്റിലില്ല. എന്നാലും, മുഖ്യ തിരഞ്ഞെടുപ്പ് കമ്മീഷണറുടെ നടപടികളോടുള്ള തങ്ങളുടെ പ്രതിഷേധം രേഖപ്പെടുത്താന് വേണ്ടിയാണ് ഇങ്ങനെയൊരു നീക്കമെന്ന് ഒരു മുതിര്ന്ന പ്രതിപക്ഷ നേതാവ് അറിയിച്ചു.
Related News
