അമ്മാന്‍: മധ്യപൗരസ്ത്യ ദേശത്തെ പ്രമുഖ ടൂറിസം കേന്ദ്രമായി ജോര്‍ദാന്‍ മാറുന്നു. രാജ്യത്തിന്റെ സുരക്ഷ, സ്ഥിരത, പ്രകൃതി, സാംസ്‌കാരിക വൈവിധ്യം, മിതമായ കാലാവസ്ഥ എന്നിവ സന്ദര്‍ശകരുടെ എണ്ണത്തില്‍ ഗണ്യമായ വര്‍ദ്ധനവിന് കാരണമായി.

ജോര്‍ദാന്‍ ടൂറിസം ബോര്‍ഡ് ഡയറക്ടര്‍ ജനറല്‍ ഡോ. അബ്ദുല്‍ റസാഖ് അറബിയാത്ത് പറയുന്നതനുസരിച്ച്, പ്രതിവര്‍ഷം 11 ലക്ഷത്തിലധികം വിനോദസഞ്ചാരികളുമായി സൗദി അറേബ്യയാണ് ജോര്‍ദാനിലേക്കുള്ള യാത്രക്കാരില്‍ കൂടുതല്‍. രണ്ടാം സ്ഥാനത്ത് 1,80,000 സന്ദര്‍ശകരുമായി അമേരിക്കയും തുടര്‍ന്ന് കുവൈത്ത്, യുഎഇ, ഖത്തര്‍, ബഹ്‌റൈന്‍, ഒമാന്‍ തുടങ്ങിയ ഗള്‍ഫ് സഹകരണ കൗണ്‍സില്‍ രാജ്യങ്ങളുമാണ്. ജോര്‍ദാനിലെത്തുന്ന സന്ദര്‍ശകരില്‍ 60%-ത്തിലധികവും ഗള്‍ഫ് രാജ്യങ്ങളില്‍ നിന്നുള്ളവരാണ്. ഇത് സാമൂഹികവും സാംസ്‌കാരികവുമായ ബന്ധങ്ങളുടെ ആഴം വ്യക്തമാക്കുന്നു.

ജോര്‍ദാന്റെ മിതമായ കാലാവസ്ഥ, പ്രത്യേകിച്ച് വേനല്‍ക്കാലത്ത്, ഒരു പ്രധാന ആകര്‍ഷണമാണ്. അമ്മാനില്‍ രാത്രികാല താപനില 19-20 ഡിഗ്രി സെല്‍ഷ്യസിലേക്ക് താഴുന്നത് സഞ്ചാരികള്‍ക്ക് പുറത്തിറങ്ങി പുരാവസ്തു കേന്ദ്രങ്ങളായ ജെറാഷ്, അജ്‌ലൂണ്‍, അതുപോലെ ഷോപ്പിംഗ് മാളുകള്‍, കലാ സാംസ്‌കാരിക പരിപാടികള്‍ എന്നിവ ആസ്വദിക്കാന്‍ അവസരം നല്‍കുന്നു.

സാഹസിക ടൂറിസം, മെഡിക്കല്‍ ടൂറിസം, ഫുഡ് ടൂറിസം എന്നിവയും ജോര്‍ദാനില്‍ പുതിയ ട്രെന്‍ഡായി മാറുന്നുണ്ട്. വാദി റം മരുഭൂമിയിലെ സാഹസിക വിനോദങ്ങളും അഖബയിലെ വാട്ടര്‍ സ്പോര്‍ട്സും ഏറെ പ്രചാരം നേടിയിട്ടുണ്ട്. കൂടാതെ, ജോര്‍ദാന്റെ വൈവിധ്യമാര്‍ന്ന വിഭവങ്ങള്‍ ആസ്വദിക്കാന്‍ ആയിരക്കണക്കിന് ആളുകളാണ് ഫുഡ് ടൂറിസത്തിന്റെ ഭാഗമായി എത്തുന്നത്.

2024-ല്‍ 2,24,000-ത്തിലധികം പേരാണ് ജോര്‍ദാനെ വൈദ്യസഹായത്തിനായി സന്ദര്‍ശിച്ചത്. 2025-ല്‍ ഈ വളര്‍ച്ച തുടരുമെന്നാണ് പ്രതീക്ഷിക്കുന്നത്. ചാവുകടല്‍, മൈന്‍ ഹോട്ട് സ്പ്രിംഗ്സ് തുടങ്ങിയ പ്രകൃതിദത്ത ചികിത്സാ കേന്ദ്രങ്ങളും വിപുലമായ ആരോഗ്യ സംരക്ഷണ സേവനങ്ങളും ഈ മേഖലയിലെ വളര്‍ച്ചക്ക് ആക്കം കൂട്ടുന്നു.

ഫോട്ടോ: ജോര്‍ദാന്‍ ടൂറിസം ബോര്‍ഡ് ഡയറക്ടര്‍ ജനറല്‍ ഡോ. അബ്ദുല്‍ റസാഖ് അറബിയാത്ത്.