ഗാസ- കിംഗ് സല്മാന് ഹ്യൂമാനിറ്റേറിയന് എയ്ഡ് ആന്ഡ് റിലീഫ് സെന്റര് വഴി സൗദി അറേബ്യ നല്കുന്ന സഹായത്തിന് ഗാസയിലെ നിരവധി ആളുകള് നന്ദി അറിയിച്ചു. ഗാസയില് ഭക്ഷ്യക്ഷാമം രൂക്ഷമായ സാഹചര്യത്തിലാണ് സൗദി സഹായം എത്തിച്ചത്.
കിംഗ് സല്മാന് സെന്ററില്നിന്ന് ലഭിച്ച ഈ സഹായം, തങ്ങളുടെ ദുരിതങ്ങള് ലഘൂകരിക്കാന് സഹായിച്ചെന്ന് ഒരു ഗുണഭോക്താവ് പറഞ്ഞു. ഗാസയിലെ മോശമായ ജീവിത സാഹചര്യങ്ങള്ക്കിടയില് സൗദിയുടെ സഹായം കൃത്യസമയത്ത് എത്തിയെന്ന് ഒരു രക്തസാക്ഷിയുടെ ഭാര്യ പറഞ്ഞു.
ഫലസ്തീന് ജനതയെ പിന്തുണക്കുന്നതില് സൗദി അറേബ്യ ഒരിക്കലും മടികാണിച്ചിട്ടില്ലെന്ന് മറ്റൊരു ഗുണഭോക്താവ് പറഞ്ഞു. ചരിത്രത്തിലെ ഏറ്റവും ദുരിതപൂര്ണ്ണമായ സമയങ്ങളില് സൗദി അറേബ്യ പലസ്തീനൊപ്പം നിന്നിട്ടുണ്ട്. പ്രത്യേകിച്ച് ഈ നിര്ണ്ണായക ഘട്ടത്തില്, ഗാസയില് ആവശ്യമായ എല്ലാ ഭക്ഷ്യവസ്തുക്കളും എത്തിക്കാന് സൗദി ശ്രമിച്ചു. ഭക്ഷണവും മരുന്നും ഇന്ധനവും വെള്ളവും വൈദ്യുതിയും ഉള്പ്പെടെയുള്ളവയുടെ ലഭ്യത കുറഞ്ഞത് ഗാസയിലെ ജനങ്ങള്ക്ക് വലിയ ദുരിതമുണ്ടാക്കിയിരുന്നു.
2007-ല് സൗദി അറേബ്യ സ്ഥാപിച്ച ഒരു സ്കൂള് ഷെല്ട്ടറിലാണ് അവര് താമസിക്കുന്നത്. അനാഥരും രക്തസാക്ഷികളുടെ ഭാര്യമാരും വീടുകള് നഷ്ടപ്പെട്ട നിരവധി ആളുകളും ഇവിടെ അഭയം തേടിയിട്ടുണ്ട്. ഈ ദുരിതസമയത്ത് ഗാസയിലെ ജനങ്ങള്ക്ക് സൗദി നല്കുന്ന സഹായത്തിന് അവര് നന്ദി അറിയിച്ചു.
ഈ നിര്ണായക സാഹചര്യങ്ങളില് തങ്ങളുടെ ദുരിതം ലഘൂകരിക്കാന് ലക്ഷ്യമിട്ടുള്ള സൗദി അറേബ്യയുടെ ഈ മാനുഷിക സഹായത്തിന് അവിടുത്തെ ഭരണനേതൃത്വത്തോടും സര്ക്കാരിനോടും ജനങ്ങളോടും ഗാസയിലെ ജനങ്ങള് തങ്ങളുടെ നന്ദി അറിയിച്ചു.
Related News
