റിയാദ്: പരിസ്ഥിതി നിയമങ്ങള്‍ ലംഘിച്ച് മരങ്ങള്‍ മുറിച്ച രണ്ട് സ്വദേശികളെ പരിസ്ഥിതി സുരക്ഷാ സേന അറസ്റ്റ് ചെയ്തു. ഇമാം തുര്‍ക്കി ബിന്‍ അബ്ദുല്ല റോയല്‍ റിസര്‍വില്‍ നിന്ന് മൂന്ന് ക്യുബിക് മീറ്റര്‍ വിറക് കടത്താന്‍ ശ്രമിക്കുന്നതിനിടെയാണ് ഇവര്‍ പിടിയിലായത്.

നിയമപരമായ നടപടിക്രമങ്ങള്‍ പൂര്‍ത്തിയാക്കിയ ശേഷം പ്രതികളെ ബന്ധപ്പെട്ട അധികാരികള്‍ക്ക് കൈമാറി. പിടിച്ചെടുത്ത വിറകും അധികൃതര്‍ക്ക് കൈമാറിയിട്ടുണ്ട്.

വിറകും കരിയും കടത്തുന്നതിന് ഓരോ ക്യുബിക് മീറ്ററിനും 16,000 റിയാല്‍ വരെ പിഴ ചുമത്തുമെന്ന് അധികൃതര്‍ അറിയിച്ചു. പരിസ്ഥിതിക്കും വന്യജീവികള്‍ക്കും എതിരായുള്ള എല്ലാത്തരം ആക്രമണങ്ങളും തടയുന്നതിന്റെ ഭാഗമായാണ് ഈ നടപടി.

പരിസ്ഥിതി സംരക്ഷണം സംബന്ധിച്ച നിയമലംഘനങ്ങള്‍ ശ്രദ്ധയില്‍പ്പെട്ടാല്‍ ബന്ധപ്പെട്ട ഉദ്യോഗസ്ഥരെ അറിയിക്കണമെന്ന് പരിസ്ഥിതി സുരക്ഷാ സേന പൊതുജനങ്ങളോട് അഭ്യര്‍ത്ഥിച്ചു. മക്ക, മദീന, റിയാദ്, കിഴക്കന്‍ പ്രവിശ്യ എന്നിവിടങ്ങളില്‍ 911 എന്ന നമ്പറിലും, സൗദി അറേബ്യയിലെ മറ്റ് പ്രദേശങ്ങളില്‍ 999, 996 എന്നീ നമ്പറുകളിലും വിവരങ്ങള്‍ അറിയിക്കാം.

വിവരം നല്‍കുന്നവരുടെ വിവരങ്ങള്‍ പൂര്‍ണ്ണമായും രഹസ്യമായി സൂക്ഷിക്കുമെന്നും, അവര്‍ക്കെതിരെ ഒരു നിയമനടപടിയുമുണ്ടാവില്ലെന്നും അധികൃതര്‍ വ്യക്തമാക്കി.