പട്ന: പാകിസ്ഥാന് ആസ്ഥാനമായുള്ള ഭീകരസംഘടനയായ ജെയ്ഷെ മുഹമ്മദുമായി ബന്ധമുള്ള മൂന്ന് ഭീകരര് ഇന്ത്യ-നേപ്പാള് അതിര്ത്തി വഴി ബിഹാറിലേക്ക് നുഴഞ്ഞുകയറിയെന്ന ഇന്റലിജന്സ് മുന്നറിയിപ്പിനെ തുടര്ന്ന് സംസ്ഥാനത്ത് അതീവ ജാഗ്രത പ്രഖ്യാപിച്ചതായി ബിഹാര് പോലീസ് സ്ഥിരീകരിച്ചു.
സംശയിക്കുന്നവരുടെ രേഖാചിത്രങ്ങള് പോലീസ് പുറത്തുവിട്ടിട്ടുണ്ട്. ഇവര്ക്കായി അതിര്ത്തി പ്രദേശങ്ങളിലും, പ്രത്യേകിച്ച് നേപ്പാളിനോട് ചേര്ന്നുള്ള ജില്ലകളിലും നിരീക്ഷണം ശക്തമാക്കി. ഈ വര്ഷാവസാനം നടക്കാനിരിക്കുന്ന നിയമസഭാ തിരഞ്ഞെടുപ്പിന്റെ പശ്ചാത്തലത്തില് സംസ്ഥാനത്ത് രാഷ്ട്രീയ പ്രവര്ത്തനങ്ങള് ഊര്ജിതമായിരിക്കുന്ന സമയത്താണ് ഈ മുന്നറിയിപ്പ്. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തര മന്ത്രി അമിത് ഷാ, ലോക്സഭയിലെ പ്രതിപക്ഷ നേതാവ് രാഹുല് ഗാന്ധി തുടങ്ങിയ ദേശീയ നേതാക്കളുടെ സന്ദര്ശനങ്ങള് വര്ധിച്ചതിനാല് സുരക്ഷാ ക്രമീകരണങ്ങള് ശക്തമാക്കിയിട്ടുണ്ട്.
രാഹുല് ഗാന്ധി നിലവില് 1,300 കിലോമീറ്റര് 'വോട്ട് അധികാര് യാത്ര' നടത്തുകയാണ്. വ്യാഴാഴ്ച നേപ്പാള് അതിര്ത്തി ജില്ലകളായ സിതാമര്ഹി, മോത്തിഹാരി എന്നിവിടങ്ങളിലൂടെ കടന്നുപോയ യാത്ര വെള്ളിയാഴ്ച മറ്റൊരു അതിര്ത്തി ജില്ലയായ ബെട്ടിയയില് നിന്ന് പുനരാരംഭിക്കും. പിന്നീട് പടിഞ്ഞാറന് ബിഹാര് ജില്ലകളായ ഗോപാല്ഗഞ്ച്, സിവാന്, സരണ് എന്നിവിടങ്ങളിലേക്ക് നീങ്ങും. ഓഗസ്റ്റ് 17-ന് സസാരമില് നിന്ന് ആരംഭിച്ച 16 ദിവസത്തെ ഈ യാത്ര വോട്ടര് പട്ടികയിലെ ക്രമക്കേടുകള് ഉയര്ത്തിക്കാട്ടാനാണ് ലക്ഷ്യമിടുന്നത്.
Related News
