ബംഗളൂരു- കര്ണാടകയിലെ ബംഗളൂരുവില് നിര്മാണത്തൊഴിലാളിയായി ജോലി ചെയ്യുകയായിരുന്ന ശുഭം സബര് എന്ന 19-കാരന് നീറ്റ് പരീക്ഷയില് ഉജ്ജ്വല വിജയം. ജൂണ് 14-ന് ജോലി സ്ഥലത്തായിരിക്കുമ്പോഴാണ് താന് നീറ്റ് പരീക്ഷയില് വിജയിച്ച വിവരം ശുഭം അറിയുന്നത്. കഠിനാധ്വാനത്തിന്റെ ക്ഷീണം മുഴുവന് മായ്ച്ചുകളയുന്നതായിരുന്നു ആ ഫോണ് കോള്.
'എന്റെ കണ്ണുകള് നിറഞ്ഞുപോയി. ഞാന് ഡോക്ടറാകാന് പോകുകയാണെന്ന് എന്റെ മാതാപിതാക്കളോട് പറഞ്ഞു,' ശുഭം സബര് ഓര്മ്മിക്കുന്നു. 'പിന്നീട് എന്റെ കരാറുകാരനെ വിവരമറിയിക്കുകയും ഞാന് സ്വരുക്കൂട്ടിയ പണം ആവശ്യപ്പെടുകയും ചെയ്തു.'
ഒഡിഷയിലെ ഖുര്ദ ജില്ലയിലെ മുദുലിദിയ ഗ്രാമത്തിലെ ഒരു കര്ഷകന്റെ മകനാണ് ശുഭം. സാമ്പത്തികമായി പിന്നോക്കം നില്ക്കുന്ന ഒരു കുടുംബത്തില് നിന്നാണ് ശുഭം വരുന്നത്. പഠനത്തില് മിടുക്കനായ ശുഭം പത്താം ക്ലാസ്സില് 84% മാര്ക്ക് നേടിയിരുന്നു. തുടര്ന്ന് പ്ലസ് വണ്, പ്ലസ് ടു പഠനത്തിനായി ഭുവനേശ്വറിലെ ബി.ജെ.ബി. കോളേജില് ചേര്ന്നു. ഈ സമയത്താണ് ഡോക്ടറാകാനുള്ള ആഗ്രഹം ഉണ്ടാകുന്നത്.
നീറ്റ് പരീക്ഷ എഴുതിയ ശേഷം, ബംഗളൂരുവിലേക്ക് പോവുകയും അവിടെ നിര്മാണത്തൊഴിലാളിയായി മൂന്ന് മാസത്തോളം ജോലി ചെയ്യുകയും ചെയ്തു. ഈ സമയത്ത് സ്വരുകൂട്ടിയ പണം ഉപയോഗിച്ചാണ് അദ്ദേഹം നീറ്റ് പരിശീലനത്തിനും, പിന്നീട് എം.ബി.ബി.എസ് പ്രവേശനത്തിനും ആവശ്യമായ പണം കണ്ടെത്തിയത്. പട്ടികവര്ഗ്ഗ വിഭാഗത്തില് 18,212-ാം റാങ്ക് നേടിയ ശുഭത്തിന് ഒഡിഷയിലെ ബെറാംപൂരിലുള്ള മെഡിക്കല് കോളേജ് ആന്ഡ് ഹോസ്പിറ്റലില് പ്രവേശനം ലഭിച്ചു.
തന്റെ പഞ്ചായത്തില് കഴിഞ്ഞ നാല് വര്ഷത്തിനിടയിലെ ആദ്യത്തെ മെഡിക്കല് വിദ്യാര്ഥിയാണ് ശുഭം. ഈ വിജയം കഠിനാധ്വാനത്തിനും നിശ്ചയദാര്ഢ്യത്തിനും ലഭിച്ച അംഗീകാരമായി നാട്ടുകാര് കാണുന്നു.
Related News
