റിയാദ്: സൗദി അറേബ്യയില്‍ പല ഭാഗങ്ങളിലും ഇന്നും ശക്തമായ മഴ തുടരുമെന്ന് നാഷണല്‍ സെന്റര്‍ ഓഫ് മെറ്റീരിയോളജി (NCM) അറിയിച്ചു. രാജ്യത്തിന്റെ വിവിധ ഭാഗങ്ങളില്‍ ഇടിമിന്നലോടു കൂടിയ മിതമായതും കനത്തതുമായ മഴക്ക് സാധ്യതയുണ്ട്. ഇത് പെട്ടന്നുള്ള വെള്ളപ്പൊക്കത്തിനും കാരണമായേക്കാം. ജിസാന്‍, അസീര്‍, അല്‍-ബാഹ, മക്ക എന്നിവിടങ്ങളിലെ ചില പ്രദേശങ്ങളില്‍ മഴയോടൊപ്പം ആലിപ്പഴം വീഴാനും ശക്തമായ കാറ്റ് വീശാനും സാധ്യതയുണ്ട്. ഇത് കാഴ്ച കുറയ്ക്കാന്‍ ഇടയാക്കും. ഈ പ്രദേശങ്ങളിലെ ഉയര്‍ന്ന സ്ഥലങ്ങളില്‍ മൂടല്‍മഞ്ഞ് രൂപപ്പെടാനും സാധ്യതയുണ്ടെന്ന് മുന്നറിയിപ്പില്‍ പറയുന്നു.

കിഴക്കന്‍ പ്രവിശ്യ, നജ്റാന്‍ തുടങ്ങിയ മേഖലകളിലെ ചില ഭാഗങ്ങളില്‍ ഒറ്റപ്പെട്ട മഴ തുടരും. ഈ പ്രദേശങ്ങളില്‍ ഉപരിതല കാറ്റ് സജീവമാകാനും, ഇത് പൊടിക്കാറ്റിന് കാരണമാകാനും സാധ്യതയുണ്ട്. റിയാദ്, മദീന എന്നിവിടങ്ങളിലും സമാനമായ കാലാവസ്ഥ അനുഭവപ്പെടാം.

റിപ്പോര്‍ട്ട് അനുസരിച്ച്, ചെങ്കടലില്‍ ഉപരിതല കാറ്റ് വടക്ക് പടിഞ്ഞാറ് ദിശയില്‍ നിന്ന് വടക്കോട്ടായിരിക്കും. മണിക്കൂറില്‍ 20-45 കിലോമീറ്റര്‍ വേഗത്തില്‍ കാറ്റടിക്കാന്‍ സാധ്യതയുണ്ട്. ഇടിമിന്നലുള്ള മേഘങ്ങള്‍ രൂപപ്പെടുന്നതോടെ കാറ്റിന്റെ വേഗം മണിക്കൂറില്‍ 55 കിലോമീറ്റര്‍ വരെ എത്താം. തിരമാലകള്‍ 1 മുതല്‍ 2 മീറ്റര്‍ വരെ ഉയരത്തില്‍ എത്താനും സാധ്യതയുണ്ട്.

അറബിക്കടലില്‍, കാറ്റ് വടക്ക് പടിഞ്ഞാറ് ദിശയില്‍നിന്ന് പടിഞ്ഞാറോട്ടായിരിക്കും. മണിക്കൂറില്‍ 15-40 കിലോമീറ്റര്‍ വേഗത്തില്‍ കാറ്റടിക്കാന്‍ സാധ്യതയുണ്ട്. തിരമാലകള്‍ 1 മുതല്‍ 2 മീറ്റര്‍ വരെ ഉയരത്തില്‍ എത്താം. കടല്‍ പൊതുവെ ശാന്തമായിരിക്കുമെന്നും റിപ്പോര്‍ട്ടില്‍ പറയുന്നു.