റിയാദ്: സൗദിയുടെ തലസ്ഥാന നഗരവാസികള്‍ക്ക് ആശ്വാസം പകര്‍ന്ന് കെട്ടിടങ്ങളുടെ വാടക നിരക്കില്‍ നേരിയ കുറവ്. വില്ല അപാര്‍ട്മെന്റ് വാടകകള്‍ റിയാദില്‍ കുത്തനെ ഉയര്‍ന്നു കൊണ്ടിരിക്കുകയായിരുന്നു. അതിനാണിപ്പോള്‍ ഇടിവ് സംഭവിക്കാന്‍ തുടങ്ങിയെന്നാണ് കണക്കുകള്‍ സൂചിപ്പിക്കുന്നത്. സൗദി റിയല്‍ എസ്റ്റേറ്റ് സ്റ്റോക് എക്സ്ചേഞ്ചിന്റെ കണക്ക് പ്രകാരം ശരാശരി 40 ശതമാനം വരെയാണ് ഇടിവ്. വാടക കുറക്കാനുള്ള സൗദി ഭരണകൂടത്തിന്റെ പ്രത്യേക പദ്ധതികള്‍ക്ക് പിന്നാലെയാണ് നിരക്കിടിവ് ഉണ്ടായിട്ടുള്ളത്. അതില്‍ പ്രധാനം സൗദി കിരീടാവകാശിയുടെ നിര്‍ദേശ പ്രകാരം ഒഴിഞ്ഞു കിടക്കുന്ന റിയാദിലെ ഭൂപ്രദേശത്തിന് വന്‍ നികുതി ചുമത്താനുള്ള നടപടിയാണ്. ഇതോടെ ഭൂമിയില്‍ കെട്ടിടം പണിയാന്‍ ഉടമസ്ഥര്‍ നിര്‍ബന്ധിതരായിരിക്കുകയാണ്.

നേരത്തെ 12,000 നു ലഭിച്ചിരുന്നു രണ്ടു മുറികളുള്ള ഫ്‌ളാറ്റുകള്‍ക്ക് ഇപ്പോള്‍ 20,000-25,000 കൊടുക്കണം. ഇതിനുമുകളിലേക്കു വാടക വരുന്ന കെട്ടിടങ്ങളുടെ നിരക്കില്‍ വന്‍ വധനയാണുണ്ടായിരുന്നത്. ഇതു പലര്‍ക്കും താങ്ങാനാവുന്നതായിരുന്നില്ല. സര്‍ക്കാരിന്റെ പുതിയ നടപടിയില്‍ ഇനിയും ആശ്വാസം ഉണ്ടാകുമെന്ന പ്രതീക്ഷയിലാണ് പ്രവാസികള്‍. വാടകക്കു പുറമെ ജീവത ചെലവും വര്‍ധിച്ചത് പല കുടുംബങ്ങളെയും സാമ്പത്തികമായി തളര്‍ത്തിയിരിക്കുകയാണ്.