റിയാദ്: ക്രിസ്റ്റ്യാനോ റൊണാള്ഡോയെ അംബാസഡറാക്കി ആഗോള ടൂറിസം കാമ്പയിന് സൗദി തുടക്കമിട്ടു. ടൂറിസം അതോറിറ്റിയുടെ നേതൃത്വത്തിലാണ് ആഗോള കാമ്പയിന് നടത്തുന്നത്. സൗദിയിലെ വൈവിധ്യ പൂര്ണവും സമ്പന്നവുമായ ആഗോള ഇവന്റുകള് ലോകത്തിനു മുന്നില് അവതരിപ്പിക്കുകയാണ് കാമ്പയിനിലൂടെ ലക്ഷ്യമിടുന്നത്.
'ഐ കേം ഫോര് ഫുട്ബാള്, സ്റ്റേയ്ഡ് ഫോര് മോര്' (ഞാന് ഫുട്ബോളിനായി വന്നതാണ്, പക്ഷേ തുടരുന്നത് കൂടുതല് അനുഭവങ്ങള്ക്കായാണ്) എന്ന തലക്കെട്ടിലാണ് കാമ്പയിന് സംഘടിപ്പിക്കുന്നത്. കാമ്പയിനിന്റെ പ്രധാന പ്രചാരകനായി ക്രിസ്റ്റ്യാനോ റൊണാള്ഡോയെയാണ് അവതരിപ്പിക്കുന്നത്. യൂറോപ്പ്, ഇന്ത്യ, ചൈന ഉള്പ്പെടെ പ്രധാന അന്താരാഷ്ട്ര വിപണികളായിരിക്കും കാമ്പയിന് ലക്ഷ്യമിടുക. വര്ഷം മുഴുവന് രാജ്യത്ത് നടക്കുന്ന സ്പോര്ട്സ്, സംസ്കാരിക, വിനോദ ഇവന്റുകള് തുടങ്ങിയവ അന്തരാഷ്ട്ര തലത്തില് പ്രചരിപ്പിക്കുന്നതിന്റെ ഭാഗമായാണിത്. സൗദി എക്സെപ്ഷണല് കലണ്ടര് ഓഫ് ഇവന്റ്സും കാമ്പയിനിന്റെ ഭാഗമായി പുറത്തിറക്കി.
ഇ സ്പോര്ട്സ് വേള്ഡ് കപ്പ്, ഫോര്മുല വണ് റേസുകള്, ഗോള്ഫ് എല് ഐ വി ചാമ്പ്യന്ഷിപ്പ്, ടെന്നീസ്, ബോക്സിങ് ടൂര്ണമെന്റുകള് എന്നിവ കലണ്ടറില് ഉള്പെടും.സൗദിയെ ആഗോള സ്പോര്ട്സ് കേന്ദ്രമാക്കി മാറ്റാനുള്ള യാത്രയില് പങ്കാളിയാകുന്നത് അഭിമാനം നല്കുന്നുവെന്നും, രാജ്യത്തിന്റെ സ്ട്രാറ്റജിക് ദര്ശനം, സംസ്കാരം, ദേശീയത തുടങ്ങിയവ അന്താരാഷ്ട്ര തലത്തില് പ്രചരിപ്പിക്കുന്നതില് സന്തോഷമുണ്ടെന്നും റിയാദ് ആസ്ഥാനമായ അല്-നസ്ര് ടീമിന് വേണ്ടി കളിക്കുന്ന ക്രിസ്റ്റ്യാനോ റൊണാള്ഡോ പറഞ്ഞു. 2022-ല് അല്-നസറില് ചേര്ന്നതിന് ശേഷം, റൊണാള്ഡോ സൗദിയിലെ കായിക രംഗത്തിന്റെ മുഖമായി മാറി. 2027 വരെ തുടരാനായി അടുത്തിടെ കരാര് പുതുക്കിയിരുന്നു.
സാംസ്കാരിക യാഥാര്ത്ഥ്യവും, സൗഹൃദാത്മകമായ അതിഥിസല്ക്കാരവും, ലോകോത്തര ഇവന്റുകളുടെ ആവേശവും ഒരുമിപ്പിക്കുന്ന ആഗോള കേന്ദ്രമായി സൗദിയെ മാറ്റുകയാണ് കാമ്പയിന്റെ ലക്ഷ്യമെന്ന് ടൂറിസം മന്ത്രി അഹ്മദ് അല് ഖതീബ് പറഞ്ഞു.
Related News
