സൗദിയിലെ പ്രാദേശിക മ്യൂസിയങ്ങളിലെ ശേഖരങ്ങള് ആധുനിക സാങ്കേതികവിദ്യയുടെ സഹായത്തോടെ പ്രദര്ശിപ്പിക്കുന്ന, 'നമ്മുടെ സൗദി കഥ: മ്യൂസിയങ്ങളിലേക്കുള്ള ഒരു ജാലകം' എന്ന പേരില് സഞ്ചരിക്കുന്ന പ്രദര്ശനത്തിന് മ്യൂസിയംസ് അതോറിറ്റി തുടക്കം കുറിച്ചു. ബുറൈദ ഡേറ്റ്സ് കാര്ണിവലിനോട് അനുബന്ധിച്ച് അല്-ഖസിം മേഖലയിലെ ബുറൈദ നഗരത്തിലാണ് പ്രദര്ശനത്തിന്റെ ആദ്യ ഘട്ടം ആരംഭിച്ചത്. ഈ മാസം 13 വരെ നീണ്ടുനില്ക്കുന്ന പ്രദര്ശനം കാഴ്ചക്കാര്ക്ക് പുതിയ അനുഭവമാണ് നല്കുന്നത്.
വരും വര്ഷങ്ങളില് ഘട്ടംഘട്ടമായി തുറക്കാന് ഉദ്ദേശിക്കുന്ന പ്രാദേശിക മ്യൂസിയങ്ങളുടെ മുദ്രാവാക്യമാണ് 'നമ്മുടെ സൗദി കഥ'. പതിനൊന്ന് മ്യൂസിയങ്ങള് സൗദി അറേബ്യയുടെ സാംസ്കാരിക-പൈതൃക ചരിത്രത്തിന്റെ സമഗ്രമായ വിവരണം അവതരിപ്പിക്കും, ഓരോ മ്യൂസിയവും ഈ ദേശീയ കഥയിലെ ഒരു അധ്യായമായിരിക്കും.
പഴമയും പുതുമയും സമ്മേളിക്കുന്ന ഈ പ്രദര്ശനത്തില്, സൗദി മ്യൂസിയങ്ങളില് നിന്നുള്ള പതിനൊന്ന് പുരാവസ്തുക്കള് ഡിജിറ്റല് രൂപത്തില് പുനര്നിര്മ്മിച്ച് ചലനാത്മകമായ ഡിസൈന് സാങ്കേതിക വിദ്യകളും ശബ്ദ ഇഫക്റ്റുകളും ഉപയോഗിച്ച് അവതരിപ്പിക്കുന്നു. ഇത് സന്ദര്ശകര്ക്ക് ദേശീയ പൈതൃകവുമായി നേരിട്ട് സംവദിക്കാന് അവസരം നല്കുന്നു.
പാരമ്പര്യത്തെക്കുറിച്ച് സമൂഹത്തിന്റെ അവബോധം വര്ദ്ധിപ്പിക്കുന്നതിനും, ദേശീയ സ്വത്വം സംരക്ഷിക്കുന്നതിനും പുതിയ തലമുറയ്ക്ക് പരിചിതമായ ഭാഷയില് അത് അവതരിപ്പിക്കുന്നതിനും സാങ്കേതികവിദ്യയുടെ സാധ്യതകള് ഉപയോഗിക്കുകയാണ് പ്രദര്ശനത്തിന്റെ ലക്ഷ്യമെന്ന് മ്യൂസിയംസ് അതോറിറ്റി വ്യക്തമാക്കി. സമൂഹത്തിന്റെ പങ്കാളിത്തം വര്ദ്ധിപ്പിക്കുന്നതിനായി പ്രവേശനം സൗജന്യമാക്കിയിട്ടുണ്ട്.
ഗിന്നസ് ബുക്ക് ഓഫ് റെക്കോര്ഡ്സ് അനുസരിച്ച് ലോകത്തിലെ ഏറ്റവും വലിയ ഈന്തപ്പഴ വിപണന മേളയായ ബുറൈദ ഡേറ്റ്സ് കാര്ണിവലുമായി ഒത്തുചേര്ന്ന് ഈ പ്രദര്ശനം സംഘടിപ്പിച്ചത് അതിന്റെ പ്രാധാന്യം വര്ദ്ധിപ്പിച്ചു. വാണിജ്യപരവും സാമ്പത്തികവും സാമൂഹികവുമായ വേദിയായ കാര്ണിവല്, അതിന്റെ പാരമ്പര്യവും കാര്ഷിക പൈതൃകവും കൊണ്ട് സമ്പന്നമായ അല്-ഖസിം മേഖലയുടെ പ്രാധാന്യവും ഊട്ടിയുറപ്പിക്കുന്നതാണ്.
ഈ പ്രദര്ശനത്തെ 'ഭൂതകാലത്തെയും, വര്ത്തമാനത്തെയും, ഭാവിയെയും ബന്ധിപ്പിക്കുന്ന പാലം' എന്നാണ് വിശേഷിപ്പിക്കുന്നത്. പരമ്പരാഗത പ്രദര്ശന രീതികളില് നിന്ന് മാറി പുതിയൊരു അനുഭവമാണ് ഇത് നല്കുന്നത്. സൗദി വിഷന് 2030-യുടെ ഭാഗമായ മ്യൂസിയംസ് അതോറിറ്റിയാണ് ഈ പ്രദര്ശനം സംഘടിപ്പിച്ചത്. മ്യൂസിയങ്ങളെ സാംസ്കാരികവും സാമൂഹികവുമായ പ്രവര്ത്തനങ്ങളിലെ സജീവമായ ഇടങ്ങളാക്കി മാറ്റാനും, വികസനത്തിന് അവയുടെ സംഭാവന വര്ദ്ധിപ്പിക്കാനും ഇത് ലക്ഷ്യമിടുന്നു.
അല്-ഖസിമിലെ ആദ്യ പ്രദര്ശനത്തിന് ശേഷം, റിയാദ്, നജ്റാന്, ജിദ്ദ എന്നിവിടങ്ങളിലേക്ക് പ്രദര്ശനം യാത്ര ചെയ്യും. ഓരോ സ്ഥലത്തെയും പ്രത്യേകതകള്ക്കനുസരിച്ചായിരിക്കും പ്രദര്ശനം ഒരുക്കുക.
