ദുബായ്: പാസ്പോര്ട്ടോ മറ്റ് തിരിച്ചറിയല് രേഖകളോ കാണിക്കാതെ വിമാനയാത്ര സാധ്യമാക്കുന്ന സ്മാര്ട്ട് കൊറിഡോര് സംവിധാനം ദുബായില് വിപുലമാക്കുന്നു. ദുബായ് വിമാനത്താവളത്തിന്റെ ടെര്മിനല് മൂന്നിലാണ് ഈ സൗകര്യം വിപുലമാക്കുന്നത്.
ദുബായ് വിമാനത്താവളം ടെര്മിനല് മൂന്നില് റെഡ് കാര്പറ്റ് എന്ന പേരിലാണ് സ്മാര്ട്ട് കൊറിഡോര് സംവിധാനം വിപുലീകരിക്കുന്നത്. എമിഗ്രേഷന് നടപടികള്ക്ക് ഇവിടെ പാസ്പോര്ട്ടോ മറ്റ് തിരിച്ചറിയല് രേഖകളോ ആവശ്യമില്ല എന്നതാണ് ഇതിന്റെ പ്രത്യേകത. കൊറിഡോറിലൂടെ കടന്നുപോകുന്ന യാത്രക്കാരുടെ മുഖവും കണ്ണും സ്കാന് ചെയ്യുന്ന കാമറകള് എ.ഐ. സാങ്കേതികവിദ്യയുടെ സഹായത്തോടെ യാത്രക്കാരെ തിരിച്ചറിയും.
സ്മാര്ട്ട് കോറിഡോറില് ഒരേസമയം 10 യാത്രക്കാരെ വരെ കൈകാര്യം ചെയ്യാാവും. ആറ് മുതല് 14 സെക്കന്ഡ് കൊണ്ട് യാത്രക്കാരെ തിരിച്ചറിയുന്ന നടപടി പൂര്ത്തിയാകും. ദുബായില് നിന്ന് പുറത്തേക്ക് യാത്ര ചെയ്യുമ്പോഴും തിരിച്ചുവരുമ്പോഴും ഈ സൗകര്യം പ്രയോജനപ്പെടുത്താം. ലോകത്തെ ആദ്യത്തെ അതിവേഗ എമിഗ്രേഷന് സംവിധാനമായി വിശേഷിപ്പിക്കപ്പെടുന്ന ഈ സാങ്കേതികവിദ്യ ഏറ്റവും പുതിയ ബയോമെട്രിക് ഐഡന്റിഫിക്കേഷനും ആര്ട്ടിഫിഷ്യല് ഇന്റലിജന്സും സംയോജിപ്പിച്ചാണ് പ്രവര്ത്തിക്കുന്നത്. വിമാന യാത്രക്കാര്ക്ക് ഒട്ടേറെ സമയലാഭത്തിന് ഇതുപകരിക്കും.
Related News
