തായിഫ്: സൗദി ഒട്ടകങ്ങളുടെ മികവ് ഒരിക്കല്‍ കൂടി തെളിയിച്ചുകൊണ്ട്, 2025-ലെ ഒട്ടകമേളയിലെ 'ലാഖയ' വിഭാഗം മത്സരങ്ങള്‍ സമാപിച്ചു. സൗദി ക്യാമല്‍ ഫെഡറേഷന്റെ നേതൃത്വത്തില്‍ ചരിത്രപ്രസിദ്ധമായ തായിഫ് റേസ് കോഴ്സില്‍ നടന്ന മേളയില്‍, ശക്തമായ മത്സരങ്ങളും ഒപ്പം പ്രാദേശിക, അന്താരാഷ്ട്ര പങ്കാളിത്തവും ശ്രദ്ധേയമായിരുന്നു.

മത്സരത്തിലെ 33 റൗണ്ടുകളില്‍ 30 എണ്ണത്തിലും സൗദി ഒട്ടകങ്ങള്‍ ഒന്നാം സ്ഥാനം നേടി. യു.എ.ഇ. രണ്ട് റൗണ്ടുകളിലും ഖത്തര്‍ ഒരു റൗണ്ടിലും വിജയിച്ചു. രാവിലെയും വൈകുന്നേരവുമായി നടന്ന മത്സരങ്ങളില്‍ ആകെ 1,438 ഒട്ടകങ്ങളാണ് പങ്കെടുത്തത്. ഇതില്‍ 873 ഒട്ടകങ്ങള്‍ രാവിലെയും 565 എണ്ണം വൈകുന്നേരവും മത്സരിച്ചു.

അബ്ദുല്‍ റഹീം ഹമ്മാദ് അല്‍-അന്‍മിയുടെ ഉടമസ്ഥതയിലുള്ള 'അല്‍-മുത്തഹിദ്' എന്ന ഒട്ടകം 'ലാഖയ' വിഭാഗത്തിലെ ഏറ്റവും മികച്ച സമയം രേഖപ്പെടുത്തി. 12-ാം റൗണ്ടില്‍ 6:04.346 മിനിറ്റില്‍ ഫിനിഷ് ചെയ്ത അല്‍-മുത്തഹിദ്, ഈ രംഗത്തെ സൗദി ഒട്ടകങ്ങളുടെ തയ്യാറെടുപ്പും മികവും എത്രത്തോളമുണ്ടെന്ന് വ്യക്തമാക്കുന്നു.

കഴിഞ്ഞ ചൊവ്വാഴ്ച ആരംഭിച്ച ഈ മേളയുടെ ഏഴാം പതിപ്പില്‍, അഞ്ച് പുരുഷ-വനിതാ ഒട്ടകയോട്ടമത്സരങ്ങള്‍ ഉള്‍പ്പെടെ 249 റൗണ്ടുകളാണ് നടന്നത്. 50 ദശലക്ഷം റിയാലിലധികം സമ്മാനത്തുകയാണ് ഈ മേളയില്‍ വിതരണം ചെയ്യുന്നത്.

മേളയുടെ അവസാന ദിവസമായ നാളെ, കിരീടാവകാശിയുടെ പേരിലുള്ള പ്പിനായുള്ള നാല് നിര്‍ണ്ണായക റൗണ്ടുകള്‍ നടക്കും. ഇതിനായി 4.4 ദശലക്ഷം റിയാലാണ് സമ്മാനത്തുകയായി നീക്കിവെച്ചിരിക്കുന്നത്. 'ഓപ്പണ്‍', 'ജനറല്‍' വിഭാഗങ്ങളിലെ 'ബക്കാര്‍', 'ഖഅ്ദാന്‍' ഓട്ടമത്സരങ്ങള്‍ ആവേശം വര്‍ദ്ധിപ്പിക്കും.

മേഖലയിലെ ഏറ്റവും വലിയ കായിക-സാംസ്‌കാരിക പരിപാടികളിലൊന്നായ ഈ മേള, സൗദി അറേബ്യയുടെ സമ്പന്നമായ പൈതൃകത്തെയാണ് പ്രതിഫലിക്കുന്നത്. തായിഫിലെ വിനോദസഞ്ചാര മേഖലയെയും സാമ്പത്തിക വളര്‍ച്ചയെയും ഉത്തേജിപ്പിക്കുകയുമാണ് മേളയുടെ പ്രധാന ലക്ഷ്യങ്ങള്‍.