റിയാദ്: സൗദി അറേബ്യയുടെ വിവിധ ഭാഗങ്ങളില്‍ ഇടിമിന്നലോടും ആലിപ്പഴവര്‍ഷത്തോടും കൂടിയ കനത്ത മഴയ്ക്ക് സാധ്യതയുണ്ടെന്ന് ദേശീയ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. ജിസാന്‍, അസീര്‍, അല്‍-ബാഹ, മക്ക എന്നിവിടങ്ങളില്‍ മിതമായതോ കനത്തതോ ആയ ഇടിമിന്നലോടു കൂടിയ മഴയ്ക്ക് സാധ്യതയുണ്ടെന്ന് കാലാവസ്ഥാ റിപ്പോര്‍ട്ടില്‍ പറയുന്നു. ഇത് വെള്ളപ്പൊക്കത്തിനും കാരണമായേക്കാം. ശക്തമായ കാറ്റും പൊടിക്കാറ്റും വീശാന്‍ സാധ്യതയുണ്ട്.

കൂടാതെ, റിയാദ്, കിഴക്കന്‍ പ്രവിശ്യ, നജ്റാന്‍ എന്നിവിടങ്ങളില്‍ നേരിയതോ മിതമായതോ ആയ മഴയ്ക്ക് സാധ്യതയുണ്ടെന്നും റിപ്പോര്‍ട്ടില്‍ സൂചിപ്പിക്കുന്നു.

ചെങ്കടലില്‍, വടക്കും മധ്യഭാഗത്തും വടക്ക്-പടിഞ്ഞാറ് ദിശയിലോ വടക്ക് ദിശയിലോ മണിക്കൂറില്‍ 15-40 കിലോമീറ്റര്‍ വേഗത്തില്‍ ഉപരിതല കാറ്റ് വീശാന്‍ സാധ്യതയുണ്ട്. തെക്കന്‍ ഭാഗങ്ങളില്‍ കാറ്റിന്റെ വേഗം മണിക്കൂറില്‍ 50 കിലോമീറ്റര്‍ വരെ എത്തിയേക്കാം. തിരമാലകള്‍ 1 മുതല്‍ 2 മീറ്റര്‍ വരെ ഉയരാന്‍ സാധ്യതയുണ്ട്. മഴക്കാറുകള്‍ രൂപപ്പെടുന്നതിനാല്‍ തെക്കന്‍ ഭാഗങ്ങളില്‍ കടല്‍ പ്രക്ഷുബ്ധമാകാന്‍ സാധ്യതയുണ്ട്.

അറബിക്കടലില്‍, വടക്ക്-പടിഞ്ഞാറ് ദിശയിലോ പടിഞ്ഞാറ് ദിശയിലോ മണിക്കൂറില്‍ 15-35 കിലോമീറ്റര്‍ വേഗത്തില്‍ ഉപരിതല കാറ്റ് വീശും. തിരമാലകള്‍ അര മീറ്റര്‍ മുതല്‍ ഒന്നര മീറ്റര്‍ വരെ ഉയരാന്‍ സാധ്യതയുണ്ട്. കടല്‍ പൊതുവെ ശാന്തമായിരിക്കും.

കാലാവസ്ഥാ വ്യതിയാനങ്ങള്‍ക്കനുസരിച്ച് യാത്രയിലും മറ്റു കാര്യങ്ങളിലും അതീവ ജാഗ്രത പാലിക്കണമെന്ന് അധികൃതര്‍ പൊതുജനങ്ങള്‍ക്ക് നിര്‍ദ്ദേശം നല്‍കി.