റിയാദ്: സൗദി ശൂറാ കൗണ്സിലിന്റെ ഒന്പതാം സെഷന്റെ രണ്ടാം വര്ഷത്തെ പ്രവര്ത്തനങ്ങള് നാളെ (ബുധനാഴ്ച) ആരംഭിക്കും. തിരുഗേഹങ്ങളുടെ സേവകന് സല്മാന് ബിന് അബ്ദുല് അസീസ് അല് സൗദ് രാജാവിനുവേണ്ടി കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന് വാര്ഷിക പ്രസംഗം നിര്വഹിക്കും.
ശൂറാ കൗണ്സില് സ്പീക്കര് ശൈഖ് ഡോ. അബ്ദുല്ല ബിന് മുഹമ്മദ് ബിന് ഇബ്രാഹിം അല് അല്-ശൈഖ്, രാജ്യത്തിന്റെ നേതൃത്വത്തില് നിന്നുള്ള തുടര്ച്ചയായ പിന്തുണക്കും മാര്ഗനിര്ദേശങ്ങള്ക്കും നന്ദി അറിയിച്ചു. ഇത് കൗണ്സിലിന് അതിന്റെ നിയമനിര്മ്മാണപരവും മേല്നോട്ടപരവുമായ ചുമതലകള് ഏറ്റവും മികച്ച രീതിയില് നിര്വഹിക്കാന് പ്രാപ്തി നല്കുന്നതായി അദ്ദേഹം പറഞ്ഞു.
സല്മാന് രാജാവിനുവേണ്ടി കിരീടാവകാശി വാര്ഷിക പ്രസംഗം നടത്തുന്നതില് അദ്ദേഹം അഭിമാനം രേഖപ്പെടുത്തി. ഈ വാര്ഷിക പ്രസംഗം രാജ്യം വലിയ താല്പര്യത്തോടെ ഉറ്റുനോക്കുന്ന ഒരു സുപ്രധാന ദേശീയ സംഭവമാണെന്ന് അദ്ദേഹം ഊന്നിപ്പറഞ്ഞു. രാജ്യത്തിന്റെ ആഭ്യന്തര, വിദേശ നയങ്ങള് വ്യക്തമാക്കുന്നതും, വികസനത്തിന്റെയും പുരോഗതിയുടെയും പാതയില് രാജ്യം മുന്നോട്ട് പോകുന്നത് ഉറപ്പ് വരുത്തുന്നതുമായ പ്രധാനപ്പെട്ട മാര്ഗ്ഗനിര്ദ്ദേശങ്ങള് പ്രസംഗത്തില് ഉണ്ടാകുമെന്നും അദ്ദേഹം പറഞ്ഞു.
മേഖലയിലും അന്താരാഷ്ട്ര തലത്തിലും സൗദി അറേബ്യയുടെ ശക്തമായ നിലപാടുകളും സ്വാധീനവും ഈ പ്രസംഗം ഉയര്ത്തിക്കാട്ടും. നിയമനിര്മ്മാണ, മേല്നോട്ട ചുമതലകള് നിര്വഹിക്കുന്നതിന് ശൂറാ കൗണ്സിലിന് ഇത് വഴികാട്ടിയാകുമെന്നും ഡോ. അബ്ദുല്ല അല്-ശൈഖ് കൂട്ടിച്ചേര്ത്തു.
Related News
