റിയാദ്: ഇസ്രയേല്‍ ഖത്തറിന് നേരെ നടത്തിയ ആക്രമണത്തെ സൗദി അറേബ്യ ശക്തമായി അപലപിച്ചു. ഖത്തറിന്റെ പരമാധികാരത്തിന് നേരെയുണ്ടായ കടന്നുകയറ്റത്തേയും അതിക്രമത്തെയും സൗദി അറേബ്യ ഏറ്റവും ശക്തമായ ഭാഷയില്‍ അപലപിക്കുകയും തള്ളിപ്പറയുകയും ചെയ്തു.

സഹോദര രാഷ്ട്രമായ ഖത്തറിന് എല്ലാ പിന്തുണയും ഐക്യദാര്‍ഢ്യവും സൗദി അറേബ്യ പ്രഖ്യാപിച്ചു. ഖത്തര്‍ സ്വീകരിക്കുന്ന എല്ലാ നടപടികള്‍ക്കും പൂര്‍ണ്ണ പിന്തുണ നല്‍കുമെന്നും സൗദി അറിയിച്ചു. കുറ്റകൃത്യങ്ങള്‍ തുടരുന്ന ഇസ്രയേല്‍ അധിനിവേശത്തിന്റെ ഭവിഷ്യത്തുകളെക്കുറിച്ച് സൗദി മുന്നറിയിപ്പ് നല്‍കി. ഇത് അന്താരാഷ്ട്ര നിയമങ്ങളെയും എല്ലാ മാനദണ്ഡങ്ങളെയും പരസ്യമായി ലംഘിക്കുന്ന നടപടിയാണെന്നും സൗദി വ്യക്തമാക്കി.

നികൃഷ്ടമായ ആക്രമണത്തെ അപലപിക്കാനും മേഖലയുടെ സുരക്ഷയെയും സ്ഥിരതയെയും തുരങ്കം വെക്കുന്ന ഇസ്രായേലിന്റെ അതിക്രമങ്ങള്‍ അവസാനിപ്പിക്കാനും സൗദി അറേബ്യ അന്താരാഷ്ട്ര സമൂഹത്തോട് ആവശ്യപ്പെട്ടു.