ദമാം: സൗദിയിലെ അല്‍കോബാര്‍ ശിമാലിയയിലെ താമസ സ്ഥലത്ത് ഇന്ത്യന്‍ യുവതി കൊലപ്പെടുത്തിയ മൂന്ന് മക്കളുടെ മൃതദേഹങ്ങള്‍ ഇന്ന് ജുമാ നമസ്‌കാര ശേഷം അല്‍ ഖോബാര്‍ ഖബര്‍സ്ഥാനില്‍ ഖബറടക്കും. കഴിഞ്ഞ ആഴ്ച്ചയാണ് മക്കളെ കൊലപ്പെടുത്തി യുവതി ജീവനൊടുക്കാന്‍ ശ്രമിച്ചത്. തെലുങ്കാന ഹൈദരാബാദ് ടോളിചൗക്കി സ്വദേശിനി സൈദ ഹുമൈറ അംറീനാണ് ഈ ക്രൂരകൃത്യം ചെയ്തത്. ഇവരിപ്പോള്‍ പോലീസ് കസ്റ്റഡിയിസാണ്.

ആറു വയസുകാരും ഇരട്ടകളുമായ മുഹമ്മദ് സാദിഖ് അഹമ്മദ്, മുഹമ്മദ് ആദില്‍ അഹമ്മദ്, മൂന്നു വയസുകാരനായ മുഹമ്മദ് യുസുഫ് അഹമ്മദ് എന്നിവരെ കൊലപ്പെടുത്തിയ ശേഷമാണ് മാതാവ് ആത്മഹത്യക്ക് ശ്രമിച്ചത്. മുഹമ്മദ് ഷാനവാസിന്റെ ഭാര്യയാണ് സൈദ.

ബാത്ത് ടബ്ബില്‍ വെള്ളം നിറച്ച് കുട്ടികളെ ശ്വാസം മുട്ടിച്ച് കൊലപ്പെടുത്തുകയായിരുന്നുവെന്നാണ് വിവരം. തുടര്‍ന്ന് സ്വയം ജീവനൊടുക്കാന്‍ ശ്രമിക്കവേ യുവതി കാല്‍വഴുതി വീണ് ബോധം നഷ്ടപ്പെട്ടു. പിന്നീട് ഭര്‍ത്താവ് എത്തി വിളിച്ചപ്പോഴാണ് വിവരം അറിയുന്നത്. ആറ് മാസം മുമ്പാണ് കുടുംബം സന്ദര്‍ശന വിസയില്‍ സൗദിയിലെത്തിയത്. കുടുംബ പ്രശ്നമാണ് കൊലപാതകത്തിലേക്കും ജീവനൊടുക്കാനുള്ള ശ്രമത്തിലേക്കും നയിച്ചതെന്നാണ് കരുതുന്നത്. എന്നാല്‍ ഭാര്യക്ക് മാനസിക പ്രശ്നമുള്ളതായാണ് ഭാര്‍ത്താവ് ഷാനവാസ് പറയുന്നത്. ലോക കേരള സഭാംഗം നാസ് വക്കത്തിന്റെയും സാമൂഹിക പ്രവര്‍ത്തകന്‍ കബീര്‍ കൊണ്ടോട്ടിയുടെയും നേതൃത്വത്തിലാണ് നിയമനടപടികള്‍ പൂര്‍ത്തിയാക്കിയത്.