ഭോപ്പാല്: ഭാര്യയെ ഭര്ത്താവ് നഗരമധ്യത്തിലെ തിരക്കേറിയ റോഡില്വച്ച് വെടിവച്ചു കൊന്നു. ഗ്വാളിയറിലെ രൂപ് സിങ് സ്റ്റേഡിയത്തിനു സമീപം കഴിഞ്ഞ ദിവസം ഉച്ചക്കുശേഷമാണ് സംഭവം. അരവിന്ദ് പരിഹാര് ഭാര്യ നന്ദിനിയെ (28) തടഞ്ഞുനിര്ത്തി തോക്ക് പുറത്തെടുത്ത് തലയിലേക്ക് വെടിയുതിര്ക്കുകയായിരുന്നു. കുടുംബ പ്രശ്നങ്ങളെ തുടര്ന്ന് ഇരുവരും വേര്പിരിഞ്ഞു ജീവിക്കുകയായിരുന്നു. പ്രതിയെ പൊലീസ് കസ്റ്റഡിയിലെടുത്തു.
പകല് സമയം ആളുകള് നോക്കിനില്ക്കെ പൊതുസ്ഥലത്തുവച്ചാണ് അരവിന്ദ് ഭാര്യ നന്ദിനിയെ വെടിയുതിര്ത്ത് കൊലപ്പെടുത്തിയത്. പൊലീസ് കണ്ണീര്വാതക ഷെല് പ്രയോഗിച്ചതോടെയാണ് തോക്കുധാരിയായ അരവിന്ദിനെ കീഴടക്കാന് സാധിച്ചത്. സ്റ്റേഷനിലേക്ക് കൊണ്ടുപോവുന്നതിനു മുന്പ് നാട്ടുകാര് ഇയാളെ മര്ദ്ദിച്ചു. നന്ദിനിയെ ആശുപത്രിയില് എത്തിച്ചെങ്കിലും ജീവന് രക്ഷിക്കാന് ആയില്ല.
സെപ്റ്റംബര് 9ന് നന്ദിനി എസ്പി ഓഫിസില് അരവിന്ദിനെതിരെ പരാതി നല്കിയിരുന്നു. തന്നെ വഞ്ചിച്ചുവെന്നും വിവാഹം കഴിക്കുമ്പോള് അദ്ദേഹത്തിന് കുട്ടികളുണ്ടായിരുന്നുവെന്നും കാണിച്ചാണ് പരാതി നല്കിയത്. 2024 നവംബറില് അരവിന്ദും സുഹൃത്ത് പൂജ പരിഹറും തന്നെ ആക്രമിച്ചതായും ഭീഷണിപ്പെടുത്തിയതായും പരാതിയില് പറഞ്ഞിരുന്നു. ഇവര്ക്കിടയില് വഴക്കുകള് സ്ഥിരമായിരുന്നെങ്കിലും പലതും ഒത്തുതീര്പ്പാക്കി ദാമ്പത്യം തുടരുകയായിരുന്നു.
Related News
