ന്യൂയോര്‍ക്ക്- ഫലസ്തീന്‍ പ്രശ്‌നം സമാധാനപരമായ മാര്‍ഗങ്ങളിലൂടെ പരിഹരിക്കുന്നതിനും, ദ്വിരാഷ്ട്ര പരിഹാരം നടപ്പാക്കുന്നതിനുമായി സൗദി അറേബ്യയും ഫ്രാന്‍സും ചേര്‍ന്ന് സംഘടിപ്പിച്ച ഉന്നതതല അന്താരാഷ്ട്ര സമ്മേളനത്തിന്റെ ഫലമായുണ്ടായ 'ന്യൂയോര്‍ക്ക് പ്രഖ്യാപന'ത്തിന് ഐക്യരാഷ്ട്രസഭയുടെ പൊതുസഭ അംഗീകാരം നല്‍കിയ തീരുമാനത്തെ മുസ്ലിം വേള്‍ഡ് ലീഗ് സ്വാഗതം ചെയ്തു.

മുസ്ലിം ലോകത്തിന്റെ പ്രതിനിധാനം വഹിക്കുന്ന മുസ്ലിം വേള്‍ഡ് ലീഗ് സെക്രട്ടറി ജനറലും മുസ്ലിം പണ്ഡിതന്മാരുടെ സമിതി അധ്യക്ഷനുമായ ഷെയ്ഖ് ഡോ. മുഹമ്മദ് ബിന്‍ അബ്ദുല്‍ കരീം അല്‍-ഇസ്സ, ഫലസ്തീന്‍ വിഷയത്തിലുള്ള സൗദി അറേബ്യയുടെ ശക്തമായ നിലപാടിനെ അഭിനന്ദിച്ചു. ദ്വിരാഷ്ട്ര പരിഹാരം നടപ്പാക്കുന്നതിനായുള്ള അന്താരാഷ്ട്ര സഖ്യത്തിന് സൗദി നേതൃത്വം നല്‍കുന്നുണ്ട്. കൂടാതെ, സംയുക്ത അറബ്-ഇസ്ലാമിക് മന്ത്രിതല സമിതിയുടെ അധ്യക്ഷസ്ഥാനം വഹിച്ചതും, ഫ്രാന്‍സുമായി ചേര്‍ന്ന് സമാധാനപരമായ പരിഹാരത്തിനുള്ള സമ്മേളനം സംഘടിപ്പിച്ചതും ഈ ചരിത്രപരമായ തീരുമാനത്തിലേക്ക് നയിച്ച പ്രധാന ഘടകങ്ങളാണെന്ന് അദ്ദേഹം ചൂണ്ടിക്കാട്ടി.

ജനറല്‍ അസംബ്ലിയിലെ ഈ പ്രഖ്യാപനം, ഫലസ്തീന്‍ ജനതയുടെ അവകാശങ്ങള്‍ സംരക്ഷിക്കാനുള്ള അന്താരാഷ്ട്ര സമൂഹത്തിന്റെ കൂട്ടായ പരിശ്രമത്തിന്റെ വിജയമാണെന്ന് മുസ്ലിം വേള്‍ഡ് ലീഗ് അഭിപ്രായപ്പെട്ടു.