ബംഗളൂരു: സാമ്പത്തിക പ്രയാസത്താലും ദാരിദ്ര്യംകൊണ്ടും രണ്ട് കുട്ടികളെ കൊലപ്പെടുത്തി യുവാവ് ജീവനൊടുക്കി. ആത്മഹത്യക്ക് ശ്രമിച്ച ഭാര്യയെ ബന്ധുക്കള്‍ രക്ഷപ്പെടുത്തി. ബംഗളൂരു നഗരത്തിന് കിഴക്ക് ഹോസ്‌കോട്ടെ താലൂക്കിലെ ഗോണകനഹള്ളിയിലാണ് സംഭവം. ശിവകുമാര്‍ (32), മകള്‍ ചന്ദ്രകല (11), മകന്‍ ഉദയ് സൂര്യ (ഏഴ്) എന്നിവരെ ഞായറാഴ്ച വൈകുന്നേരം വീട്ടില്‍ മരിച്ച നിലയില്‍ കണ്ടെത്തുകയായിരുന്നു. ഭാര്യ മഞ്ജുള (30) ആത്മഹത്യക്കു ശ്രമിച്ചുവെങ്കിലും അപ്പോഴേക്കും ബന്ധുക്കളെത്തി രക്ഷപ്പെടുത്തി.

ശിവകുമാറിന് നാല് വര്‍ഷം മുമ്പുണ്ടായ അപകടത്തില്‍ രണ്ട് കാലുകള്‍ക്കും ഗുരുതരമായി പരിക്കേറ്റിരൂന്നു. ചികിത്സക്കായി വലിയ തുക ചെലഴിക്കേണ്ടി വുന്നു. ഭീമമായ തുക കടം വാങ്ങിയിരുന്നു. പക്ഷേ കാര്യമായ പുരോഗതിയൊന്നും ഉണ്ടായില്ല. കുട്ടികള്‍ അനാഥരാകുന്നത് ഇഷ്ടപ്പെടാത്തതിനാല്‍ കുട്ടികളോടൊപ്പം ആത്മഹത്യ ചെയ്യാന്‍ ദമ്പതികള്‍ തീരുമാനിക്കുകയായിരുന്നുവെന്ന് പോലീസ് പറയുന്നു.

ഞായറാഴ്ച ഉച്ചകഴിഞ്ഞ്, കുട്ടികളെ ഉറക്കത്തില്‍ കഴുത്തു ഞെരിച്ച് കൊലപ്പെടുത്തിയതായും പിന്നീട് ബക്കറ്റ് വെള്ളത്തില്‍ മുക്കയും കൊലപ്പെടുത്തുകയായിരുന്നു. ആത്മഹത്യയ്ക്ക് ശ്രമിക്കുന്നതിന് മുമ്പ്, മഞ്ജുളയോട് ശിവകുമാര്‍ ലഘുഭക്ഷണം വാങ്ങിത്തരാന്‍ ആവശ്യപ്പെട്ടു. തിരിച്ചെത്തിയപ്പോഴേക്കും അയാള്‍ തൂങ്ങിമരിച്ചിരുന്നു. തുടര്‍ന്ന് മഞ്ജുള ഒരു ബന്ധുവിനെ വിളിച്ച് സംഭവം വിവരിക്കുകയും താന്‍ ആത്മഹത്യ ചെയ്യാന്‍ ശ്രമിക്കുന്നതിന് മുമ്പ് അന്ത്യകര്‍മങ്ങള്‍ സംബന്ധിച്ച നിര്‍ദേശങ്ങള്‍ നല്‍കുകയും ചെയ്തു. എന്നാല്‍ ബന്ധു വീട്ടിലേക്ക് ഓടിയെത്തി പൊലീസിനെ അറിയിക്കുകയും മഞ്ജുളയെ രക്ഷിക്കുകയുമായിരുന്നു.