റിയാദ്: സൗദി അറേബ്യയും കുവൈത്തും സുരക്ഷ സഹകരണം കൂടുതല് ശക്തിപ്പെടുത്താന് തീരുമാനിച്ചു. സൗദി ആഭ്യന്തരമന്ത്രി അമീര് അബ്ദുല് അസീസ് ബിന് സഊദ് ബിന് നാഇഫും കുവൈത്ത് ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ശൈഖ് ഫഹദ് യൂസുഫ് സഊദ് അല്സബാഹും തമ്മില് നടത്തിയ കൂടിക്കാഴ്ചയിലാണ് ധാരണ.
ഇതു പ്രകാരം വിവരങ്ങളും വൈദഗ്ധ്യവും കൈമാറുന്നതതും സംഘടിത കുറ്റകൃത്യങ്ങള് തടയുന്നതിനുള്ള സഹകരണവു ശക്തപ്പെടുത്തും. കൂടാതെ, സുരക്ഷ പരിശീലന സംവിധാനം ശക്തിപ്പെടുത്തുന്നതിനും മാനവ വിഭവശേഷി വികസിപ്പിക്കുന്നതിനും, ഏറ്റവും പുതിയ സുരക്ഷ സാങ്കേതിക വിദ്യകളും സംവിധാനങ്ങളും ഉപയോഗിക്കുന്നതിനും യോജിച്ച് പ്രവര്ത്തിക്കാനും ധാരണയായി. ഇരുരാജ്യങ്ങളുടെയും അതിര്ത്തി സുരക്ഷ ഉറപ്പാക്കുന്നതിനും സംയുക്ത നിരീക്ഷണം വര്ധിപ്പിക്കുന്നതിനും ഇത് സഹായിക്കുമെന്ന് കൂടിക്കാഴ്ചയില് വിലയിരുത്തി.
സൗദി ഭരണാധികാരികളായ സല്മാന് രാജാവിന്റെയും കിരീടാവകാശിയും പ്രധാനമന്ത്രിയുമായ അമീര് മുഹമ്മദ് ബിന് സല്മാന്റെയും നിര്ദേശങ്ങള്ക്കനുസൃതമായാണ് കൂടിക്കാഴ്ചയെന്ന് സൗദി ആഭ്യന്തര മന്ത്രി അമീര് അബ്ദുല് അസീസ് ബിന് സഊദ് ബിന് നാഇഫ് വ്യക്തമാക്കി. സൗദി അറേബ്യയും കുവൈത്തും തമ്മിലുള്ള ചരിത്രപരവും സാഹോദര്യപരവുമായ ബന്ധം ഇരുരാജ്യങ്ങളും തമ്മിലുള്ള സുരക്ഷ സഹകരണത്തിന് അടിസ്ഥാനമാണെന്നും അദ്ദേഹം കൂട്ടിച്ചേര്ത്തു.
സൗദി-കുവൈത്ത് കോഓഡിനേഷന് കൗണ്സിലിന്റെ കീഴില് പ്രവര്ത്തിക്കുന്ന മിലിട്ടറി ആന്ഡ് സെക്യൂരിറ്റി കോഓഡിനേഷന് കമ്മിറ്റിയുടെ പ്രവര്ത്തനങ്ങളെ ഇരു മന്ത്രിമാരും അഭിനന്ദിച്ചു. ഇരുരാജ്യങ്ങളിലെയും മുതിര്ന്ന ഉദ്യോഗസ്ഥരും കൂടിക്കാഴ്ചയില് പങ്കെടുത്തു.
Related News
