ദുബായ്: എമിറേറ്റ്‌സ് എയര്‍ലൈന്‍സ് പൈലറ്റുമാര്‍ക്ക് പരിശീലനം നല്‍കുന്നതിന് നവീന സംവിധാനങ്ങളോടുകൂടിയ പരിശീലനകേന്ദ്രം ആരംഭിച്ചു 50 കോടി ദിര്‍ഹം ചെലവഴിച്ചാണ് പരിശീലന കേന്ദ്രം തുറന്നിരിക്കുന്നത്. നിലവിലെ ജീവനക്കാര്‍ക്കും പുതിയതായി നിയമിക്കുന്നവര്‍ക്കുമായിരിക്കും ഇവിടെ പിരശീലനം നല്‍കുക. എമിറേറ്റ്‌സ് വിമാന വ്യൂഹത്തിലെ എയര്‍ബസ് എ 350, ബോയിങ് 777 എക്‌സ് വിമാനങ്ങള്‍ക്ക് ആവശ്യമായ പൈലറ്റുമാരെയാണ് വാര്‍ത്തെടുക്കുക. 1000 പൈലററുമാരെ വരെ എല്ലാ വര്‍ഷവും ഇവിടെ പരിശീലിപ്പിക്കാനാവും.

കമ്പനിയുടെ വളര്‍ച്ചയുടെയും വിമാനങ്ങള്‍ വര്‍ധിപ്പിക്കുന്നതിന്റെയും പശ്ചാത്തലത്തിലാണ് പരിശീലന കേന്ദ്രം തുറന്നിരിക്കുന്നത്. എമിറേറ്റ്‌സ് വിമാനക്കമ്പനിയും വിമാനത്താവള ഓപറേറ്റര്‍മാരായ ഡനാറ്റയും ഉള്‍പ്പെടുന്ന എമിറേറ്റ്‌സ് ഗ്രൂപ് ഈ വര്‍ഷം 17,300 ജീവനക്കാരെ നിയമിക്കുമെന്ന് കമ്പനി രണ്ടുമാസം മുന്‍പ് പ്രഖ്യാപിച്ചിരുന്നു. കമ്പനിയുടെ വിപുലീകരണത്തിന്റെയും ഭാവി മുന്നില്‍ കണ്ടുള്ള പ്രവര്‍ത്തനങ്ങളുടെയും ഭാഗമായാണ് 350 വ്യത്യസ്ത പദവികളില്‍ പുതിയ ജീവനക്കാരെ നിയമിക്കുന്നത്. കാബിന്‍ ക്രൂ, പൈലറ്റ്, എന്‍ജിനീയര്‍, കൊമേഷ്യല്‍-സെയില്‍സ് ടീമംഗങ്ങള്‍, കസ്റ്റമര്‍ സര്‍വീസ്, ഗ്രൗണ്ട് പ്രവര്‍ത്തനം, കാറ്ററിങ്, ഐ.ടി, മാനവവിഭവ ശേഷി, ഫിനാന്‍സ് തുടങ്ങിയ മേഖലകളിലെ തസ്തികകളിലാണ് നിയമനം നടത്തുക.

4,000 കാര്‍ഗോ, കാറ്ററിങ്, ഗ്രൗണ്ട് പ്രവര്‍ത്തന വിദഗ്ദരെയാണ് ഡനാറ്റ നിമിക്കാന്‍ ലക്ഷ്യമിടുന്നത്. ലോകത്തെ 150 പട്ടണങ്ങളിലായി റിക്രൂട്ട്‌മെന്റുമായി ബന്ധപ്പെട്ട ഈവന്റുകള്‍ കമ്പനിയൊരുക്കും. യു.എ.ഇയിലെ വിദ്യാര്‍ഥികളെയും ബിരുദദാരികളെയും ലക്ഷ്യംവെച്ച് ദുബായിലും റിക്രൂട്ട്‌മെന്റ് നടക്കും. 2022 മുതല്‍ കമ്പനി 41,000 ലധികം പേരെ നിയമിച്ചിട്ടുണ്ട്. ഇതോടെ ഗ്രൂപ്പിന് നിലവില്‍ 1.21 ലക്ഷത്തിലധികം ജീവനക്കാരുണ്ട്.