റിയാദ്- സൗദി അറേബ്യന്‍ പബ്ലിക് ഇന്‍വെസ്റ്റ്മെന്റ് ഫണ്ട് സൗദി മീഡിയ ഗ്രൂപ്പായ എം.ബി.സി ഗ്രൂപ്പിന്റെ 54% ഓഹരികള്‍ 7.47 ബില്യണ്‍ സൗദി റിയാലിന് സ്വന്തമാക്കി.

സൗദി സ്റ്റോക്ക് എക്സ്ചേഞ്ചായ തദാവുലില്‍ എം.ബി.സി ഗ്രൂപ്പ് പുറത്തുവിട്ട പ്രസ്താവനയനുസരിച്ച്, അവരുടെ പ്രധാന ഓഹരി ഉടമകളിലൊരാളായ സസ്‌റ്റൈനബിലിറ്റി ഹോള്‍ഡിംഗ് കമ്പനി, സ്ഥാപനത്തിന്റെ 54% ഓഹരികള്‍ സൗദി സോവറിന്‍ വെല്‍ത്ത് ഫണ്ടിന് വിറ്റതായി അറിയിച്ചു.

മൊത്തം 179.5 ദശലക്ഷം ഓഹരികളാണ് കൈമാറ്റം ചെയ്യപ്പെട്ടത്. സസ്‌റ്റൈനബിലിറ്റി ഹോള്‍ഡിംഗും പി.ഐ.എഫും തമ്മിലുള്ള ചര്‍ച്ചകള്‍ക്ക് ശേഷമാണ് ഇടപാട് പൂര്‍ത്തിയാക്കിയത്. ഓരോ ഓഹരിക്കും 41.60 റിയാല്‍ എന്ന നിരക്കില്‍ ആകെ 7.47 ബില്യണ്‍ റിയാല്‍ ആണ് ഇടപാടിനായി പി.ഐ.എഫ് മുടക്കിയത്.

മാധ്യമ-വിനോദ മേഖലകളില്‍ വളര്‍ച്ച പ്രോത്സാഹിപ്പിക്കുകയെന്ന പി.ഐ.എഫിന്റെ തന്ത്രത്തിന്റെ ഭാഗമായാണ് ഈ ഏറ്റെടുക്കല്‍. സൗദി അറേബ്യയില്‍ മാധ്യമ നിര്‍മാണത്തിനായുള്ള സമഗ്രമായ സംവിധാനം നിര്‍മ്മിക്കുകയും അത് വഴി രാജ്യത്തിന്റെ ഇന്നൊവേഷന്‍ ശേഷി വികസിപ്പിക്കുകയുമാണ് ഈ നീക്കത്തിന്റെ പ്രധാന ലക്ഷ്യം.

ഈ ഇടപാട് എം.ബി.സി ഗ്രൂപ്പിന്റെ പ്രവര്‍ത്തനങ്ങളിലും ഓഹരി ഉടമകളിലും ജീവനക്കാരിലും നല്ല സ്വാധീനം ചെലുത്തുമെന്ന് പ്രതീക്ഷിക്കുന്നു. മാധ്യമ-വിനോദ മേഖലകളില്‍ ഇത് പുതിയ വളര്‍ച്ചാ അവസരങ്ങള്‍ സൃഷ്ടിക്കുമെന്നും വിലയിരുത്തപ്പെടുന്നു.