ജിദ്ദ- സൗദി ഇലക്ട്രിസിറ്റി കമ്പനിയും ഇന്ത്യയുടെ എന്.ടി.പി.സിയും മിഡില് ഈസ്റ്റില് പവര് പ്ലാന്റ് സേവനങ്ങള് നല്കുന്നതിനായി സംയുക്ത സംരംഭം രൂപീകരിക്കാന് ധാരണാപത്രം ഒപ്പുവെച്ചു. സൗദി തലസ്ഥാനമായ റിയാദില് നടന്ന ചടങ്ങില് ഊര്ജ മന്ത്രാലയത്തിന്റെ മേല്നോട്ടത്തിലാണ് കരാര് ഒപ്പിട്ടത്.
ഇലക്ട്രിസിറ്റി മേഖലയിലെ സഹകരണവും സാങ്കേതിക വൈദഗ്ധ്യ കൈമാറ്റവും വര്ദ്ധിപ്പിക്കുകയാണ് കരാറിന്റെ പ്രധാന ലക്ഷ്യം. മിഡില് ഈസ്റ്റിലെയും വടക്കേ ആഫ്രിക്കയിലെയും ഏറ്റവും വലിയ വൈദ്യുതി ഉത്പാദകരും വിതരണക്കാരുമാണ് സൗദി ഇലക്ട്രിസിറ്റി കമ്പനി. സൗദി അറേബ്യയിലെ വൈദ്യുതിയുടെ പ്രധാന ഉറവിടവും ഇവര് തന്നെ. 11 ദശലക്ഷത്തിലധികം വരിക്കാരാണ് കമ്പനിക്കുള്ളത്.
പവര് പ്ലാന്റ് പ്രവര്ത്തനങ്ങള്, പരിപാലനം, നവീകരണം, വികസന പ്രവര്ത്തനങ്ങള്, സംഭരണം, എഞ്ചിനീയറിംഗ് സേവനങ്ങള്, പ്രോജക്ട് മാനേജ്മെന്റ് തുടങ്ങിയ മേഖലകളില് ഈ ധാരണാപത്രം സഹകരണം ഉറപ്പാക്കുന്നു. കൂടാതെ, ആധുനിക ഊര്ജ സാങ്കേതികവിദ്യകളിലെ ഗവേഷണത്തിലും വികസനത്തിലും സംയുക്തമായി പ്രവര്ത്തിക്കും. സ്പെഷ്യലിസ്റ്റുകള് തമ്മിലുള്ള അറിവിന്റെയും വൈദഗ്ധ്യത്തിന്റെയും കൈമാറ്റവും പുതിയ വൈദ്യുതി പദ്ധതികളിലെ നിക്ഷേപവും ഇതില് ഉള്പ്പെടുന്നു.
ഇന്ത്യയിലെ ഏറ്റവും വലിയ ഊര്ജ്ജ കമ്പനികളിലൊന്നാണ് പൊതുമേഖലാ സ്ഥാപനമായ നാഷനല് തെര്മല് പവര് കോര്പറേഷന് എന്ന എന്.ടി.പി.സി. കല്ക്കരി, ഗ്യാസ്, ജലവൈദ്യുതി, കാറ്റില്നിന്നുള്ള ഊര്ജ്ജം, സൗരോര്ജ്ജം തുടങ്ങി വിവിധ സ്രോതസ്സുകളില്നിന്ന് ഏകദേശം 77,000 മെഗാവാട്ട് വൈദ്യുതി ഉത്പാദിപ്പിക്കാന് എന്.ടി.പി.സിക്ക് ശേഷിയുണ്ട്. ഇന്ത്യക്ക് പുറത്തുള്ള വൈദ്യുതി പദ്ധതികളിലും ഇവര്ക്ക് എന്.ടി.പി.സിക്ക് വലിയ സാന്നിധ്യമുണ്ട്.
Related News
