അല്‍ ബാഹ: വധശിക്ഷ നടപ്പാക്കാന്‍ ഒരു ദിവസം മാത്രം ബാക്കി നില്‍ക്കെ പ്രതിക്ക് മാപ്പ് നല്‍കി അല്‍ ബാഹ അമീര്‍ ഡോ. ഹുസ്സാം ബിന്‍ സൗദ് ബിന്‍ അബ്ദുല്‍ അസീസ്. കൊല്ലപ്പെട്ടയാളുടെ അവകാശികളുമായി കോടതിയില്‍ വെച്ച് നടത്തിയ കൂടിക്കാഴ്ചയ്ക്ക് ശേഷമാണ് മാപ്പ് പ്രഖ്യാപനം ഉണ്ടായത്.

മരണപ്പെട്ടയാളുടെ കുടുംബം സ്വീകരിച്ച ഉദാത്തമായ നിലപാടിന് അമീര്‍ നന്ദിയും അഭിനന്ദനവും അറിയിച്ചു. കഴിവുള്ളപ്പോള്‍ ക്ഷമിക്കുക എന്നത് വിശ്വാസികളുടെയും മുസ്ലിങ്ങളുടെയും സവിശേഷതയാണെന്നും, അതിന് ദൈവം പ്രതിഫലവും ഉയര്‍ന്ന സ്ഥാനവും നല്‍കുമെന്നും അദ്ദേഹം ഓര്‍മിപ്പിച്ചു.

ക്ഷമിക്കുന്ന മനസ്സിനെ അദ്ദേഹം പ്രശംസിച്ചു. സൗദി സമൂഹത്തിന്റെ മാതൃകാപരമായ മൂല്യങ്ങളെയും കരുണയെയും പ്രതിഫലിക്കുന്ന, മാന്യവും മാനുഷികവുമായ നിലപാടാണിതെന്ന് അദ്ദേഹം വിശേഷിപ്പിച്ചു.

'നീതിയുടെ തത്വങ്ങള്‍ ഉറപ്പിക്കുക, അനുരഞ്ജനത്തിന് നിരന്തരം ആഹ്വാനം ചെയ്യുക, സഹിഷ്ണുതയുടെ സംസ്‌കാരം പ്രചരിപ്പിക്കുക, സാമൂഹിക ഐക്യം ശക്തിപ്പെടുത്തുക എന്നിവയാണ് നമ്മുടെ ജ്ഞാനികളായ നേതൃത്വത്തിന്റെ സമീപനം,' അദ്ദേഹം കൂട്ടിച്ചേര്‍ത്തു.

അമീറിന്റെ ഇടപെടലിനും സുമനസ്സുകള്‍ക്കും കൊല്ലപ്പെട്ടയാളുടെ കുടുംബം തങ്ങളുടെ അഗാധമായ നന്ദി അറിയിച്ചു. ദൈവത്തിന്റെ നിയമം നടപ്പാക്കുന്നതിലും അനുരഞ്ജനം തേടുന്നതിലുമാണ് ഈ അനുഗ്രഹീത രാജ്യത്തിന്റെ അടിത്തറയെന്നും അവര്‍ ഊന്നിപ്പറഞ്ഞു.