ജിദ്ദ- സൗദി അറേബ്യയുടെ ദേശീയ പതാക ഉപയോഗിക്കുന്നതുമായി ബന്ധപ്പെട്ട് ആഭ്യന്തര മന്ത്രാലയം കര്ശന നിര്ദ്ദേശങ്ങള് പുറത്തിറക്കി. മങ്ങുകയോ പഴകുകയോ ചെയ്ത പതാകകള് ഉപയോഗിക്കാന് പാടില്ലെന്ന് മന്ത്രാലയം വ്യക്തമാക്കി. പഴകിയ പതാകകള് ഉപയോഗിക്കുന്ന സ്ഥാപനങ്ങള് തന്നെ നശിപ്പിക്കണം. 95-ാമത് ദേശീയ ദിനാഘോഷങ്ങളോടനുബന്ധിച്ച് തങ്ങളുടെ 'എക്സ്' അക്കൗണ്ടിലൂടെയാണ് മന്ത്രാലയം ഈ നിര്ദ്ദേശങ്ങള് പുറത്തുവിട്ടത്.
പ്രധാന നിര്ദ്ദേശങ്ങള്:
-അനുചിതമായ ഉപയോഗം: പതാക ഒരു സാധനം കെട്ടാനോ ചുമക്കാനോ ഉപയോഗിക്കരുത്. മൃഗങ്ങളുടെ ശരീരത്തില് പതാക പതിപ്പിക്കാനോ അച്ചടിക്കാനോ പാടില്ല.
-വാണിജ്യപരമായ ഉപയോഗം: സൗദി പതാക ഒരു വ്യാപാരമുദ്രയായോ വാണിജ്യപരമായ പരസ്യങ്ങള്ക്കോ നിയമത്തില് പറഞ്ഞിട്ടുള്ളതല്ലാത്ത മറ്റ് ആവശ്യങ്ങള്ക്കോ ഉപയോഗിക്കുന്നത് നിരോധിച്ചിരിക്കുന്നു.
-സംരക്ഷണം: പതാക കേടുവരാനോ വൃത്തികേടാകാനോ സാധ്യതയുള്ള സ്ഥലങ്ങളില് സൂക്ഷിക്കാന് പാടില്ല.
-ഉയര്ത്തുന്ന രീതി: പതാക കൊടിമരത്തില് കെട്ടിവയ്ക്കുകയോ കുടുക്കുകയോ ചെയ്യരുത്. അത് എപ്പോഴും ഉയര്ന്നുനില്ക്കുകയും സ്വതന്ത്രമായി ചലിക്കുകയും വേണം.
-തിരിച്ചുള്ള ഉപയോഗം: ഒരു കാരണവശാലും പതാക തലകീഴായി ഉയര്ത്തരുത്.
-അപമാനിക്കരുത്: പതാകയെ അപമാനിക്കുന്ന രീതിയിലുള്ള ഒരു ഉപയോഗവും അനുവദനീയമല്ല. ഉപയോഗശേഷം വലിച്ചെറിയാന് ഉദ്ദേശിച്ചുള്ള വസ്തുക്കളില് പതാക അച്ചടിക്കരുത്.
-അലങ്കാരങ്ങള്: പതാകയുടെ അരികുകള് അലങ്കരിക്കുകയോ അതില് മറ്റ് കൂട്ടിച്ചേര്ക്കലുകള് നടത്തുകയോ ചെയ്യുന്നത് നിരോധിച്ചിരിക്കുന്നു.
-പകുതി താഴ്ത്തരുത്: രാജ്യത്തിന്റെ ദേശീയ പതാക പകുതി താഴ്ത്തുന്നത് നിരോധിച്ചിട്ടുണ്ട്.
-ചിഹ്നങ്ങള്: രാജ്യത്തിന്റെ ചിഹ്നങ്ങളായ ഈത്തപ്പനയോലയും അതിന് കുറുകെയുള്ള വാളുകളും പതാകയില് സ്ഥാപിക്കാന് പാടില്ല.
Related News
