റിയാദ്: സൗദി അറേബ്യയിലെ ജിസാന്‍, മദീന എന്നിവിടങ്ങളില്‍ ഇടിമിന്നലിനും ആലിപ്പഴ വര്‍ഷത്തിനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു. അസീര്‍, അല്‍-ബാഹ, മക്ക എന്നിവിടങ്ങളില്‍ കനത്ത കാറ്റിനും സാധ്യതയുണ്ട്. അതേസമയം, റിയാദ്, ഖസീം, ഹായില്‍ എന്നിവിടങ്ങളില്‍ കാറ്റിന്റെ വേഗം കുറവായിരിക്കും. കിഴക്കന്‍ മേഖലയിലും നജ്‌റാനിലും മേഖലകളില്‍ പൊടിക്കാറ്റും മണല്‍ക്കാറ്റും തുടരുമെന്നും കാലാവസ്ഥാ കേന്ദ്രം മുന്നറിയിപ്പ് നല്‍കി.

ചെങ്കടലിലെ ഉപരിതല കാറ്റ് വടക്ക്-പടിഞ്ഞാറ് ദിശയില്‍നിന്ന് വടക്കോട്ടായിരിക്കും. വടക്കന്‍, മധ്യഭാഗങ്ങളില്‍ മണിക്കൂറില്‍ 20-50 കിലോമീറ്റര്‍ വേഗത്തില്‍ കാറ്റ് വീശാന്‍ സാധ്യതയുണ്ട്. തെക്കന്‍ ഭാഗങ്ങളില്‍ തെക്ക്-പടിഞ്ഞാറ് ദിശയില്‍ നിന്ന് വടക്ക്-പടിഞ്ഞാറ് ദിശയിലേക്ക് കാറ്റിന്റെ വേഗം മണിക്കൂറില്‍ 12-32 കിലോമീറ്ററിലെത്താന്‍ സാധ്യതയുണ്ട്. ഇടിയോടുകൂടിയ മഴ മേഘങ്ങള്‍ രൂപംകൊള്ളുമ്പോള്‍ ഈ വേഗം മണിക്കൂറില്‍ 50 കിലോമീറ്ററിന് മുകളിലെത്താന്‍ സാധ്യതയുണ്ട്. വടക്കന്‍, മധ്യഭാഗങ്ങളില്‍ തിരമാലകളുടെ ഉയരം ഒന്നര മീറ്റര്‍ വരെയാകാന്‍ സാധ്യതയുണ്ട്. തെക്കന്‍ ഭാഗങ്ങളില്‍ അര മീറ്റര്‍ മുതല്‍ ഒന്നര മീറ്റര്‍ വരെ ഉയരത്തില്‍ തിരമാലകള്‍ ഉണ്ടാകാന്‍ സാധ്യതയുണ്ടെന്നും കാലാവസ്ഥാ കേന്ദ്രം മുന്നറിയിപ്പ് നല്‍കി.

അറബിക്കടലില്‍ വടക്ക്-പടിഞ്ഞാറ് ദിശയില്‍നിന്ന് പടിഞ്ഞാറ് ദിശയിലേക്ക് മണിക്കൂറില്‍ 25-55 കിലോമീറ്റര്‍ വേഗത്തില്‍ കാറ്റ് വീശും. തിരമാലകളുടെ ഉയരം ഒന്നര മീറ്റര്‍ മുതല്‍ രണ്ടര മീറ്റര്‍ വരെ ഉയരാന്‍ സാധ്യതയുണ്ട്. കൂടാതെ മധ്യ, തെക്കന്‍ ഭാഗങ്ങളില്‍ കടല്‍ പ്രക്ഷുബ്ധമാകാന്‍ സാധ്യതയുണ്ടെന്നും കാലാവസ്ഥാ കേന്ദ്രം അറിയിച്ചു.