അബുദാബി: യു.എസ് പ്രഖ്യാപിച്ച എച്ച്-1ബി വിസ അപേക്ഷകള്‍ക്കുള്ള 100,000 ഡോളര്‍ ഫീസ് വര്‍ദ്ധനവ് കാരണം, യു.എ.ഇയുടെ ഗോള്‍ഡന്‍ വിസ, ഫ്രീലാന്‍സ് വിസ, റിമോട്ട് വര്‍ക്ക് വിസ തുടങ്ങിയ ദീര്‍ഘകാല റെസിഡന്‍സി പ്രോഗ്രാമുകള്‍ക്ക് ആവശ്യക്കാര്‍ വര്‍ദ്ധിക്കുമെന്ന് ഇമിഗ്രേഷന്‍ കണ്‍സള്‍ട്ടന്റുമാര്‍ അഭിപ്രായപ്പെടുന്നു.

ദുബായ് ആസ്ഥാനമായുള്ള ഉപദേശക സ്ഥാപനമായ ജെ.എസ്.ബിയുടെ സ്ഥാപകനും മാനേജിംഗ് ഡയറക്ടറുമായ ഗൗരവ് കേസ്വാനി, യുഎസ് വിപണിയില്‍ നിന്ന് യു.എ.ഇ ഗോള്‍ഡന്‍ വിസയെക്കുറിച്ച് അന്വേഷണങ്ങളുടെ കുത്തൊഴുക്കുണ്ടായതായി ചൂണ്ടിക്കാട്ടി. ഉയര്‍ന്ന എച്ച്-1ബി വിസ ഫീസ്, എച്ച്-1ബി വിസ, ഗ്രീന്‍ കാര്‍ഡ് ഉടമകള്‍ക്കിടയില്‍ യു.എ.ഇയുടെ നിക്ഷേപ, ദീര്‍ഘകാല റെസിഡന്‍സി ഓപ്ഷനുകളോടുള്ള താല്‍പ്പര്യം വര്‍ദ്ധിപ്പിക്കുമെന്നും അദ്ദേഹം വിശ്വസിക്കുന്നു.

'യു.എ.ഇ ഗോള്‍ഡന്‍ വിസ, റിമോട്ട് വര്‍ക്ക് വിസ, ഫ്രീലാന്‍സ് വിസ എന്നിവയ്ക്ക് കൂടുതല്‍ ആവശ്യക്കാരുണ്ടാകും. യു.എസ് ജീവനക്കാര്‍ക്ക് യു.എ.ഇയില്‍ ഒരു സ്ഥാപനമുണ്ടാക്കി യു.എസ് കമ്പനിയുമായി ഒരു കരാറില്‍ ഏര്‍പ്പെടുകയോ അല്ലെങ്കില്‍ ഒരു ഫ്രീലാന്‍സ് വിസ നേടുകയോ ചെയ്യാം. അതിനാല്‍ ഈ വിസകള്‍ക്ക് ആവശ്യകത വര്‍ദ്ധിക്കാന്‍ സാധ്യതയുണ്ട്,' കേസ്വാനി പറഞ്ഞു.

യു.എ.ഇ, യു.എസില്‍ ലഭ്യമായ ജീവിതരീതിക്കും സാമ്പത്തിക സാഹചര്യങ്ങള്‍ക്കും സമാനമായ ഒരു ആകര്‍ഷകമായ അന്തരീക്ഷം പ്രവാസി ഇന്ത്യക്കാര്‍ക്ക് വാഗ്ദാനം ചെയ്യുന്നുണ്ടെന്നും അദ്ദേഹം ചൂണ്ടിക്കാട്ടി. 'അവര്‍ക്ക് ഇവിടെ ഒരു യു.എസ് ഡോളര്‍ അക്കൗണ്ട് ലഭിക്കും. ഡോളറും ദിര്‍ഹവും തമ്മില്‍ ബന്ധിപ്പിച്ചിരിക്കുന്നതിനാല്‍ വിദേശ വിനിമയം ഒരു പ്രധാന വെല്ലുവിളിയായിരിക്കില്ല. യു.എസില്‍ ലഭിക്കുന്നതിന് സമാനമായ ജീവിതശൈലി അവര്‍ക്ക് ഇവിടെയും ലഭിക്കും.