ദുബായ്: വിസ, തൊഴില്‍ നിയമ ലംഘനത്തിന് 161 പ്രവാസികളെ നാടുകടത്താന്‍ ഉത്തരവിട്ട് ദുബായ് സിറ്റിസണ്‍ഷിപ് ആന്‍ഡ് റെസിഡന്‍സി കോടതി ഉത്തരവിട്ടു. ഇവര്‍ക്ക് 152.24 ദശലക്ഷം ദിര്‍ഹം (ഏകദേശം 344 കോടിയിലേറെ രൂപ) പിഴ ചുമത്താനും കോടതി വിധിച്ചു. ദുബായ് അധികൃതര്‍ നടത്തിയ അന്വേഷണത്തിലാണ് ഞെട്ടിക്കുന്ന തട്ടിപ്പുകള്‍ പുറത്തുവന്നത്. പ്രതികള്‍ സ്‌പോണ്‍സര്‍ ചെയ്തിരുന്ന ജീവനക്കാരുടെ റെസിഡന്‍സി സ്റ്റാറ്റസ് നിയമപരമാക്കാതെ സ്ഥാപനങ്ങള്‍ പൂട്ടി. ഇതിനു പുറമെ പ്രവേശനാനുമതികളും ഇവര്‍ അനധികൃതമായി വില്‍ക്കുകയും കൈമാറ്റം ചെയ്യുകയും ചെയ്തതായും അന്വേഷണത്തില്‍ കണ്ടെത്തി.

തട്ടിപ്പുകാര്‍ക്ക് കര്‍ശനമായ ശിക്ഷ നല്‍കിക്കൊണ്ട് യുഎഇയുടെ തൊഴില്‍, റെസിഡന്‍സി സംവിധാനങ്ങളുടെ വിശ്വാസ്യത കാത്തുസൂക്ഷിക്കാനുള്ള ദുബായിയുടെ പ്രതിജ്ഞാബദ്ധതയാണ് ഈ വിധിയിലൂടെ തെളിയിക്കുന്നതെന്ന് അധികൃതര്‍ വ്യക്തമാക്കി. വിസ ദുരുപയോഗം ചെയ്യുകയോ താമസ നിയമങ്ങള്‍ ലംഘിക്കുകയോ ചെയ്യുന്നവര്‍ക്ക് കടുത്ത ശിക്ഷയുണ്ടാകുമെന്നും അധികൃതര്‍ മുന്നറിയിപ്പ് നല്‍കി.

രാജ്യത്തെ ഏറ്റവും വലിയ വിസ തട്ടിപ്പ് സംഘങ്ങളിലൊന്നിനെ അടുത്തിടെ ദുബായ് സിറ്റിസണ്‍ഷിപ് ആന്‍ഡ് റെസിഡന്‍സി കോടതി പിടികൂടിയിരുന്നു. 21 പേര്‍ ഉള്‍പ്പെട്ട ഈ സംഘം, വ്യാജ മേല്‍വിലാസങ്ങളില്‍ 33 സാങ്കല്‍പ്പിക കമ്പനികള്‍ സ്ഥാപിച്ച് 385 റെസിഡന്‍സി വിസകള്‍ നിയമവിരുദ്ധമായി നേടിയെടുക്കുകയും അവ മറ്റുള്ളവര്‍ക്ക് വില്‍ക്കുകയും ചെയ്തു. ഈ കേസില്‍ 25.2 ദശലക്ഷം ദിര്‍ഹം പിഴ ചുമത്തുകയും 21 പ്രതികളെയും നാടുകടത്താനും കോടതി ഉത്തരവിട്ടിരുന്നു.