ആലപ്പുഴ: മാതാ അമൃതാനന്ദമയിയുടെ നെറുകയില് താന് ചുംബിച്ചത് എല്ലാ മക്കളും അവരുടെ അമ്മമാരെ സ്നേഹിക്കണം എന്ന സന്ദേശം നല്കാന് ആണെന്ന് മന്ത്രി സജി ചെറിയാന്. അമ്മയുടെ നിഷ്കളങ്കമായ ചുംബനം തന്റെ ഹൃദയത്തെ സ്പര്ശിച്ചുവെന്നും അതുകൊണ്ടാണ് താന് അഭിനന്ദിക്കാന് പോയതെന്നും സജി ചെറിയാന് വിശദീകരിച്ചു. ഞങ്ങള് അമൃതാനന്ദമയി മഠം സന്ദര്ശിച്ച് അവരുടെ ആലിംഗനം സ്വീകരിക്കരുതെന്ന വാദം മനസ്സില് വെച്ചാല് മതി. എല്ലാവര്ക്കും അവരുടെ ആലിംഗനത്തില്പെടാം ഞങ്ങള്ക്ക് പറ്റില്ലെന്നുണ്ടോ. അമൃതാനന്ദമയിയെ ആദരിച്ചതില് സര്ക്കാരിനും മന്ത്രി സജി ചെറിയാനുമെതിരെ വ്യാപക വിമര്ശനം ഉയരുന്നതിനിടെയാണ് മന്ത്രിയുടെ പ്രതികരണം. കായംകുളത്ത് നഗരസഭ 41 വാര്ഡിലെ വി.എസ്. അച്യുതാനന്ദന് സ്മാരക വായനശാല ഉദ്ഘാടനവും ഗാന്ധിപ്രതിമ അനാച്ഛാദനവും നിര്വഹിച്ച് സംസാരിക്കവെയാണ് വിവാദത്തിന് മന്ത്രി മറുപടി പറഞ്ഞത്.
'അവര് എന്ത് തെറ്റാണ് ചെയ്തത്. ഒരുപാട് നല്ലകാര്യങ്ങള് ചെയ്യുന്നു. ഞങ്ങള് ആദരിച്ചു. അമ്മ എല്ലാവരെയും ചുംബിക്കുമല്ലോ? എനിക്കും തന്നു. എന്റെ അമ്മ എന്നെ ചുംബിക്കുന്നപോലെയാണ് കണ്ടത്. അതിന് അപ്പുറത്തേക്ക് കണ്ടില്ല. ഞാന് അമ്മയ്ക്ക് ഷാള് ഇട്ടിട്ട് ഉമ്മ നല്കി. എന്റെ അമ്മയുടെ സ്ഥാനത്ത് നില്ക്കുന്ന ആള്ക്ക് ഉമ്മ നല്കിയത് പലര്ക്കും സഹിക്കാന് കഴിഞ്ഞില്ല. ഞാന് ഡിവോട്ടിയാകാന് പോയതല്ല. അവര് ദൈവമാണോ അല്ലയോ എന്നത് എന്റെ വിഷയമല്ല. ഞങ്ങളാരും അവര് ദൈവം ആണെന്ന് പറഞ്ഞിട്ടില്ല. ആദരിക്കപ്പെടേണ്ട വ്യക്തിത്വമാണ് - സജി ചെറിയാന് പറഞ്ഞു.
Related News
