ന്യൂഡല്‍ഹി- താന്‍ മേധാവിയായിരുന്ന വിദ്യാഭ്യാസ സ്ഥാപനത്തിലെ 17 വിദ്യാര്‍ഥിനികളെ ലൈംഗികമായി പീഡിപ്പിച്ച കേസില്‍ സ്വാമി ചൈതന്യാനന്ദ സരസ്വതിയെ ഡല്‍ഹി പോലീസ് ഞായറാഴ്ച പുലര്‍ച്ചെ അറസ്റ്റ് ചെയ്തു.

ഡല്‍ഹി പോലീസിന്റെ ഒരു സംഘം ആഗ്രയിലെ ഹോട്ടലില്‍ വെച്ചാണ് ഇയാളെ കസ്റ്റഡിയിലെടുത്ത് ഡല്‍ഹിയിലേക്ക് കൊണ്ടുവന്നത്.

സ്ഥാപനത്തിലെ നിലവിലുള്ളതും മുന്‍ വിദ്യാര്‍ഥിനികളുമായ 17-ഓളം സ്ത്രീകളാണ് ചൈതന്യാനന്ദക്കെതിരെ പരാതി നല്‍കിയിട്ടുള്ളത്. ഇവര്‍ ലൈംഗികമായ അതിക്രമം ഉള്‍പ്പെടെയുള്ള പീഡനങ്ങള്‍ സ്വാമി നടത്തിയതായി ആരോപിക്കുന്നു. പരാതി നല്‍കിയവരില്‍ ഭൂരിഭാഗം പേരും സാമ്പത്തികമായി പിന്നാക്കം നില്‍ക്കുന്ന വിഭാഗത്തില്‍ നിന്നുള്ളവരാണ്.

ലൈംഗിക പീഡന പരാതികള്‍ക്ക് പുറമെ, 20 കോടി രൂപയുടെ തട്ടിപ്പും ഫണ്ട് ദുരുപയോഗവും നടത്തിയ കേസില്‍ വെള്ളിയാഴ്ച ചൈതന്യാനന്ദക്ക് ജാമ്യം നിഷേധിച്ചിരുന്നു.

ചൈതന്യാനന്ദ സ്ഥാപിച്ച ട്രസ്റ്റിന്റെ പേരിലുള്ള 18-ല്‍ അധികം അക്കൗണ്ടുകളും 8 കോടി രൂപയോളം നിക്ഷേപമുള്ള 28 ഫിക്‌സഡ് ഡിപ്പോസിറ്റുകളും പോലീസ് മരവിപ്പിച്ചിട്ടുണ്ട്.

നിലവിലെ കേസിനു പുറമെ, ചൈതന്യാനന്ദക്കെതിരെ രണ്ട് ലൈംഗിക പീഡന കേസുകള്‍ വേറെയുമുണ്ട്. 2016-ല്‍ ഇതേ സ്ഥാപനത്തിലെ ഒരു സ്ത്രീയെ പീഡിപ്പിച്ചതിന് ഇയാള്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്തിരുന്നു. സമാനമായ ഒരു കേസ് 2009-ലും രജിസ്റ്റര്‍ ചെയ്തിട്ടുണ്ട്.

2016-ലെ കേസില്‍, പ്രാഥമിക അന്വേഷണത്തിന് ശേഷം പ്രതിയെ അറസ്റ്റ് ചെയ്തിരുന്നില്ല, എന്നാല്‍ വിചാരണ തീര്‍പ്പാക്കാതെ തുടരുകയാണെന്ന് ഡെപ്യൂട്ടി കമ്മീഷണര്‍ ഓഫ് പോലീസ് (സൗത്ത് വെസ്റ്റ്) അമിത് ഗോയല്‍ നേരത്തെ അറിയിച്ചിരുന്നു.