ജിദ്ദ- ആഗോള ആരോഗ്യ സംവിധാനങ്ങളിലെ സൂചികകള്‍ കൃത്യമായി അവതരിപ്പിക്കുന്ന സി.ഇ.ഒ വേള്‍ഡ് ഹെല്‍ത്ത് കെയര്‍ ഇന്‍ഡക്‌സ് 2025-ല്‍ സൗദി അറേബ്യ ലോകത്ത് 37-ാം സ്ഥാനത്ത് എത്തി. 44.43 പോയിന്റുകള്‍ നേടിയാണ് റഷ്യ, ചൈന തുടങ്ങിയ പ്രധാന രാജ്യങ്ങളെ സൗദി പിന്നിലാക്കിയത്. അറബ് ലോകത്ത് സൗദി രണ്ടാമതായും റാങ്ക് ചെയ്യപ്പെട്ടു.

അടിസ്ഥാന സൗകര്യങ്ങള്‍, മെഡിക്കല്‍ സ്റ്റാഫുകളുടെ എണ്ണം, മരുന്നുകളുടെ ലഭ്യത, ചെലവ് തുടങ്ങിയ വെല്ലുവിളികള്‍ക്കിടയിലും രാജ്യത്തിന്റെ പുതിയ ആരോഗ്യ പരിപാലന സംവിധാനങ്ങളുടെ മികവാണ് റാങ്കിംഗിലൂടെ തെളിയുന്നത്.

സൗദി വിഷന്‍ 2030-ന്റെ ഭാഗമായി രാജ്യത്തെ ആരോഗ്യ മേഖല അതിവേഗം രൂപാന്തരപ്പെട്ടു കൊണ്ടിരിക്കുകയാണ്. രോഗപ്രതിരോധത്തിനും കണ്ടെത്തലിനും രോഗീ പരിചരണം മെച്ചപ്പെടുത്തുന്നതിനുമായി ആര്‍ട്ടിഫിഷ്യല്‍ ഇന്റലിജന്‍സും റോബോട്ടിക്‌സും ഈ മേഖലയില്‍ സമന്വയിപ്പിക്കുന്നുണ്ട്.

2024-ലെ ആരോഗ്യ സൂചികയിലും സൗദിക്ക് ഇതേ റാങ്കിംഗ് ആയിരുന്നു. 2024-ലെ ലോകത്തിലെ മികച്ച ആശുപത്രികളുടെ ന്യൂസ്വീക്ക് പട്ടികയില്‍ 35 സൗദി ആശുപത്രികള്‍ ഇടംപിടിച്ചത് ആരോഗ്യ സംരക്ഷണ മികവിനോടുള്ള രാജ്യത്തിന്റെ പ്രതിബദ്ധതയുടെ തെളിവായി. ആരോഗ്യ സംരക്ഷണ അടിസ്ഥാന സൗകര്യങ്ങള്‍ നവീകരിക്കുകയും പുതിയ സാങ്കേതികവിദ്യകള്‍ സ്വീകരിക്കുകയും ചെയ്യുന്നതിലൂടെ, നൂതന ആരോഗ്യ സേവനങ്ങള്‍ക്കായുള്ള ഒരു പ്രധാന ആഗോള കേന്ദ്രമായി സൗദി മാറുകയാണ്.

മിഡില്‍ ഈസ്റ്റ് ആന്‍ഡ് നോര്‍ത്ത് ആഫ്രിക്കന്‍ മേഖലയില്‍ യു.എ.ഇ. ആണ് ഒന്നാം സ്ഥാനത്ത് (ആഗോളതലത്തില്‍ 17). തൊട്ടുപിന്നാലെ സൗദി അറേബ്യ (37), കുവൈറ്റ് (73), മൊറോക്കോ എന്നിവയാണ്.

തായ്വാന്‍ ആഗോളതലത്തില്‍ ഒന്നാം സ്ഥാനം നിലനിര്‍ത്തി (78.72 പോയിന്റ്). 'ഭാവി-അധിഷ്ഠിതം' എന്ന് വിശേഷിപ്പിക്കപ്പെടുന്ന അവരുടെ ആരോഗ്യ സംവിധാനത്തില്‍ ഏകീകൃത പേയ്മെന്റ് സംവിധാനവും സ്മാര്‍ട്ട് ഇന്‍ഷുറന്‍സ് കാര്‍ഡുകള്‍, എഐ അടിസ്ഥാനത്തിലുള്ള ആരോഗ്യ വിവരങ്ങള്‍ പോലുള്ള ഡിജിറ്റല്‍ സേവനങ്ങളും ഉപയോഗിക്കുന്നു. ദക്ഷിണ കൊറിയ (77.7 പോയിന്റ്), ഓസ്ട്രേലിയ (74.11 പോയിന്റ്) എന്നിവ യഥാക്രമം രണ്ടും മൂന്നും സ്ഥാനങ്ങളില്‍ എത്തി.

യൂറോപ്പിന്റെ മേധാവിത്തം ഉറപ്പിച്ചുകൊണ്ട് സ്വീഡന്‍ (5), അയര്‍ലന്‍ഡ് (6), നെതര്‍ലാന്‍ഡ്സ് (7), ജര്‍മ്മനി, നോര്‍വേ എന്നിവയും പട്ടികയില്‍ ഇടം നേടി. പ്രവര്‍ത്തനസ്ഥിരതയും ആരോഗ്യ പ്രവര്‍ത്തകരുടെ നിലവാരവുമാണ് യൂറോപ്യന്‍ രാജ്യങ്ങളുടെ നേട്ടത്തിന് പ്രധാന കാരണം.