റിയാദ്: റിയാദിന് വടക്ക് മല്ഹാമിലെ റിയാദ് അന്താരാഷ്ട്ര കണ്വെന്ഷന് ആന്ഡ് എക്സിബിഷന് സെന്ററില് നടക്കുന്ന സൗദി അന്താരാഷ്ട്ര ഫാല്ക്കണ്സ് ആന്ഡ് ഹണ്ടിംഗ് എക്സിബിഷനില് മംഗോളിയന് പരുന്തുകളുടെ ലേലം ആവേശകരമായി. കടുത്ത മത്സരത്തിനൊടുവില് രണ്ട് മംഗോളിയന് പരുന്തുകള് മൊത്തം 900,000 റിയാലിനാണ് (ഏകദേശം 2.15 കോടി ഇന്ത്യന് രൂപ) വിറ്റുപോയത്.
ആദ്യ പരുന്തായ 'ഹര് ഖര്ണസ്' 200,000 റിയാലിനാണ് ലേലം ആരംഭിച്ചത്. കനത്ത മത്സരം നടന്ന ഈ പരുന്തിനെ ഒടുവില് 450,000 റിയാലിന് സ്വന്തമാക്കി. തുടര്ന്ന് ലേലത്തിനെത്തിച്ച 'ഹര് ഫറഖ്' 100,000 റിയാലില് തുടങ്ങി 450,000 റിയാലിനാണ് വിറ്റുപോയത്.
പ്രദര്ശനത്തിന്റെ ചരിത്രത്തില് ആദ്യമായി മംഗോളിയന് പരുന്തുകള്ക്കായി ഒരു പ്രത്യേക വിഭാഗം തന്നെ ഒരുക്കിയിട്ടുണ്ട്. ഉയര്ന്ന നിലവാരം കാരണം സൗദി അറേബ്യയിലെയും മേഖലയിലെയും പരുന്ത് വളര്ത്തല് താല്പര്യക്കാര്ക്കിടയില് ഏറ്റവും പ്രമുഖവും അഭിമാനകരവുമായ ഇനങ്ങളിലൊന്നായാണ് മംഗോളിയന് പരുന്തുകള് കണക്കാക്കപ്പെടുന്നത്.
കിഴക്കന് ഏഷ്യയില് നിന്നുള്ള മികച്ചയിനം മംഗോളിയന് പരുന്തുകളാണ് ഇവിടെ പ്രദര്ശിപ്പിച്ചിട്ടുള്ളത്. ഇതില്, മംഗോളിയന് സാക്കര് ഇനം പരുന്തുകളാണ് ശ്രദ്ധേയം. വലിപ്പം, നീളമേറിയ ചിറകുകള്, ഉയര്ന്ന പ്രതിരോധശേഷി എന്നിവക്ക് പേരുകേട്ടവയാണ് ഈ പരുന്തുകള്. ഇളം വെള്ള മുതല് കടും തവിട്ട് വരെ നീളുന്ന വൈവിധ്യമാര്ന്ന നിറങ്ങളുണ്ട്.
കഠിനമായ പാരിസ്ഥിതിക സാഹചര്യങ്ങളെ അതിജീവിക്കാനുള്ള കഴിവ്, പരിശീലനങ്ങളോട് പെട്ടെന്ന് പ്രതികരിക്കാനുള്ള ശേഷി എന്നിവ ഈ പരുന്തുകള്ക്ക് 'ഫാല്ക്കണ്രി' വിനോദത്തില് വ്യക്തമായ മേല്ക്കൈ നല്കുന്നു.
