ദമ്മാം: സൗദിയില്‍ ഗാര്‍ഹിക തൊഴിലാളികളുടെ ശമ്പളം ഇലക്ട്രോണിക് ആയി കൈമാറുന്നതിന്റെ നാലാം ഘട്ടം തുടങ്ങി. രണ്ടോ അതിലധികമോ വീട്ടുജോലിക്കാരുള്ള തൊഴില്‍ ദാതാക്കള്‍ ഉള്‍പ്പെടുന്നതാണ് നാലാം ഘട്ടം. ഗാര്‍ഹിക തൊഴിലാളികളുടെ വേതന അവകാശങ്ങള്‍ ഉറപ്പാക്കുന്നതിനും തൊഴിലുടമകളും തൊഴിലാളികളും തമ്മിലുള്ള കരാറിന്റെ സുതാര്യത ഉറപ്പാക്കുന്നതിനും ലക്ഷ്യമിട്ടാണ് പദ്ധതി ആരംഭിച്ചത്.

ഗാര്‍ഹിക ജീവനക്കാരുടെ റിക്രൂട്ടിംഗ് സേവനങ്ങള്‍ക്കായി ഏര്‍പ്പെടുത്തിയ മുസാനിദ് പ്ലാറ്റ് ഫോം വഴിയാണ് ശമ്പളം വിതരണം ചെയ്യുന്നത്. മാനവ വിഭവശേഷി മന്ത്രാലയത്തിന്റേതാണ് പദ്ധതി. കഴിഞ്ഞ മൂന്ന് ഘട്ടങ്ങളും വിജയകരമായി പൂര്‍ത്തിയാക്കിയതായും മന്ത്രാലയം വ്യക്തമാക്കി. 2024 ജൂലൈയിലാണ് പദ്ധതിക്ക് തുടക്കമിട്ടത്. 2026 ജനുവരി ഒന്നോടെ മുഴുവന്‍ ഘട്ടങ്ങളും പൂര്‍ത്തിയാക്കി സമ്പൂര്‍ണമായും ഇലക്ട്രോണിക് രീതിയിലേക്ക് മാറും.

സൗദി അറേബ്യയി ഏകദേശം 39.7 ലക്ഷം (3.97 മില്യണ്‍) ഗാര്‍ഹിക തൊഴിലാളികളുണ്ട്. ഇവരില്‍ ഭൂരിഭാഗവും വീട്ടുജോലിക്കാര്‍, ഹൗസ് ക്ലീനര്‍മാര്‍, ഡ്രൈവര്‍മാര്‍ തുടങ്ങിയ തസ്തികകളില്‍ ജോലി ചെയ്യുന്നവരാണ്. ഈ തൊഴിലാളികളില്‍ 27.3 ലക്ഷം പേര്‍ പുരുഷന്മാരും, 12.5 ലക്ഷം പേര്‍ സ്ത്രീകളുമാണ്. സൗദി അറേബ്യയിലേക്ക് ഗാര്‍ഹിക തൊഴിലാളികളെ റിക്രൂട്ട് ചെയ്യുന്ന രാജ്യങ്ങളുടെ പട്ടികയില്‍ ഇന്ത്യ മുന്‍നിരയിലുണ്ട്. പരമ്പരാഗതമായി ഫിലിപ്പീന്‍സ്, ഇന്തോനേഷ്യ, ഇന്ത്യ, ശ്രീലങ്ക തുടങ്ങിയ രാജ്യങ്ങളില്‍ നിന്നുള്ളവരാണ് ഈ മേഖലയില്‍ കൂടുതലായുള്ളത്. ഗാര്‍ഹിക തൊഴില്‍ നിയമങ്ങളിലെ പരിഷ്‌കാരങ്ങള്‍ 'പ്രവാസി മലയാളികളടക്കമുള്ള സാധാരണ അടിസ്ഥാന വര്‍ഗ്ഗവിഭാഗ തൊഴില്‍ മേഖലയില്‍ പണിയെടുക്കുന്ന സാധാരണക്കാര്‍ക്ക്' ആശ്വാസകരമാണ്.