ഓസ്ലോ: 2025ലെ സമാധാനത്തിനുള്ള നൊബേല് പുരസ്കാരം വെനസ്വേലന് പൊതുപ്രവര്ത്തക മരിയ കൊറിന മചാഡോക്ക്. വെനസ്വേലയിലെ പ്രതിപക്ഷ നേതാവായ മരിയ കൊറിന നടത്തിയ ജനാധിപത്യ സംരക്ഷണ പോരാട്ടങ്ങള് പരിഗണിച്ചാണ് പുരസ്കാരം. നൊബേല് സമ്മാനം തനിക്ക് ലഭിക്കണമെന്ന ആവശ്യവുമായി യു.എസ് പ്രസിഡന്റ് ഡോണള്ഡ് ട്രംപ് രംഗത്ത് വന്നതിനിടെയാണ് നൊബേല് കമ്മിറ്റിയുടെ സുപ്രധാന പ്രഖ്യാപനം.
'വെനിസ്വേലയിലെ ജനങ്ങളുടെ ജനാധിപത്യ അവകാശങ്ങള് പ്രോത്സാഹിപ്പിക്കുന്നതിനുള്ള അവരുടെ അക്ഷീണ പ്രയത്നത്തിനും സ്വേച്ഛാധിപത്യത്തില്നിന്ന് ജനാധിപത്യത്തിലേക്ക് നീതിയുക്തവും സമാധാനപരവുമായ ഒരു മാറ്റം കൈവരിക്കുന്നതിനുള്ള പോരാട്ടത്തിനുമാണ് അവര്ക്ക് സമാധാനത്തിനുള്ള നോബല് പുരസ്കാരം നല്കുന്നത്' -നൊബേല് കമ്മിറ്റി പ്രസ്താവനയില് പറഞ്ഞു.
അമേരിക്കന് പ്രസിഡന്റ് ഡോണള്ഡ് ട്രംപ് പുരസ്കാരത്തിനായി പരസ്യമായി അവകാശവാദമുന്നയിച്ചതാണ് നൊബേല് സമാധാന പുരസ്കാരം ഇത്രയേറെ ചര്ച്ചയാകാന് കാരണം. സമാധാന നൊബേലിന് തന്റെയത്ര അര്ഹത മറ്റാര്ക്കുമില്ലെന്ന അവകാശവാദം ഡോണള്ഡ് ട്രംപ് നിരന്തരം ആവര്ത്തിച്ചിരുന്നു. അധികാരത്തിലേറി ഏഴുമാസത്തിനകം ഇന്ത്യ-പാക്കിസ്ഥാന്, കംബോഡിയ-തായ്ലാന്ഡ്, കൊസോവോ-സെര്ബിയ, കോംഗോ-റുവാണ്ട, ഇസ്രായേല്-ഇറാന്, ഈജിപ്ത്-എത്യോപ്യ, അര്മേനിയ-അസര്ബൈജാന് തുടങ്ങിയ ഏഴ് അന്താരാഷ്ട്ര സംഘര്ഷങ്ങള്/ യുദ്ധങ്ങള് താന് പരിഹരിച്ചിട്ടുണ്ടെന്നായിരുന്നു ട്രംപിന്റെ അവകാശവാദം. 'നൊബേല് ലഭിക്കാതിരുന്നാല് രാജ്യത്തിന് അത് വലിയ അപമാനമാകും' എന്നാണ് പ്രതികരണം. ഏറ്റവുമൊടുവില് ഹമാസ് -ഇസ്രയേല് സംഘര്ഷം അവസാനിപ്പിക്കാന് നടത്തിയ ശ്രമങ്ങളും നൊബേല് സമ്മാനത്തിനുള്ള അര്ഹതയായി ട്രംപ് ഉയര്ത്തിക്കാട്ടി. തനിക്ക് വേണ്ടി നോബെല് സമ്മാനത്തിന് ലോബിയിങ് നടത്താന് നോര്വെയിലെ ധനമന്ത്രിയായ മുന് നാറ്റോ മേധാവി ജെന്സ് സ്റ്റോള്ട്ടന്ബര്ഗിനെ ട്രംപ് വിളിക്കുക പോലും ചെയ്തിരുന്നു.
സമാധാനത്തിനുള്ള നൊബേലിനായി 338 നോമിനികളെയാണ് നൊബെല് കമ്മിറ്റിക്ക് ലഭിച്ചത്. അതില് 244 വ്യക്തികളും 94 എണ്ണം സംഘടനകളുമായിരുന്നു. നോര്വെയുടെ പാര്ലമെന്റ് അംഗങ്ങള് തെരഞ്ഞെടുത്ത അഞ്ചംഗങ്ങളാണ് സമാധാനത്തിനുള്ള നൊബേല് പുരസ്കാര സമിതിയിലുള്ളത്.
Related News
